HEADLINE, MUNISÍPIU, OÉ-CUSSE (RAEOA), SEGURANSA

Governu reativa atendimentu vistu traballu iha sede Migrasaun Oé-Cusse

Governu reativa atendimentu vistu traballu iha sede Migrasaun Oé-Cusse

Governu reativa atendimentu públiku vistu traballu iha sede Migrasaun Oé-Cusse. Imajen mídia GPA RAEOA.

OÉ-CUSSE, 07 juñu 2024 (TATOLI) – Ministériu Interiór (MI) liuhusi Diresaun Jerál Serbisu Migrasaun, kinta ne’e reativa atendimentu públiku kona-bá vistu traballu iha sede delegasaun territorial Rejiaun Administrtiva Espesiál Oé-Cusse Ambeno (RAEOA).

“Ida-ne’e ita fó ona podér másimu ba sede rejionál migrasaun iha Oé-Cusse, atu emite kualkér tipu vistu no bele halo estensaun vistu iha Oé-Cusse, tanba Oé-Cusse hanesa rejiaun espesiál, ita tenke prepara fasilidade, ema hakarak mai investe nia tenke ba to’o Díli, entaun nia lakon barak, entaun objetivu ne’e atu fasilita atendimentu de’it iha Oé-Cusse, bainhira kaduka nia bele trata iha-ne’e de’it, la presiza ba Dili,” Ministru Interiór, Francisco da Costa Guterres, ko’alia iha otél Ambeno.

Prezidente Autoridade RAEOA, Rogério Tiago Lobato, konsidera reativasaun ne’e, nu’udar estratéjia ida tanba futuru investidór barak sei investe iha Oé-Cusse, nune’e bele fasilita atu halo estensaun.

“Inisiativa ida-ne’e, sei fasilita Oé-Cusse tanba iha investidór barak iha interese atu investe iha ne’e, entaun ho reativasaun atendimentu públiku ne’e, ba oin bele fasilita ona estensaun vistu iha RAEOA no la presiza to’o iha Dili maka foin halo estensaun, ne’e ajuda tebes RAEOA ba iha ekonomia,” nia agradese.

Eis Ministru Interiór ne’e, konfirma, polítika ne’e sei kontrola ona vistu ema tama no sai iha Timor-Leste, tanba kestaun ida ne’e sempre akontese iha mundu tomak.

“Ida-ne’e mós sei kontribui hasa’e reseita ba kofre Estadu, liuhusi emisaun vistu hamenus kazu violasaun ba iha vistu, liuhusi reativasaun atendimentu públiku iha sede rejionál territoriál RAEOA, fasilita mós atendimentu adekuadu ba sidadaun estranjeiru sira-ne’ebé tama sai no hela liuhusi postu fronteira sira hotu iha RAEOA,” nia hakotu.

Notísia relevante: Governu lansa emisaun vistu traballu iha entranjeiru no koloka adidu na’in-ualu 

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!