INSS fulan ne’e halo pagamentu ba pensaun sosiál faze daruak
DILI, 07 juñu 2024 (TATOLI)—Ministériu Solidaridade Sosiál no Inkluzasaun (MSSI) liuhusi Institutu Nasionál Seguransa Sosiál (INSS) iha loron 18 juñu 2024 sei halo pagamentu pensaun sosiál ba idozu no invalidez faze daruak iha territóriu laran.
“Tuir dadus benefisiáriu pagamentu sosiál iha faze dahuluk 97.644 no montante orsamentu nafatin $22.141.670. Ema ho defisénsia ne’ebé sei hetan pagamentu sosiál hamutuk 4.000-resin,” Prezidente Konsellu Administrasaun INSS, Arlindo Pinto, informa iha salaun MSSI, Caicoli, sesta ne’e.
Idozu ho tinan 60 to’o 69 sei simu $60 kada fulan ho totál benefisiáriu 28.896, benefisiáriu ho tinan 70 to’o 79 sei simu $80 kada fulan ho totál benefisiáriu 44.045, benefisiáriu ho tinan 80 ba leten sei simu $100 kada fulan ho totál 15.978.
Notísia relevante : Benefisiáriu 4.000-resin pensaun sosiál faze dahuluk seidauk simu pagamentu
Benefisiáriu pensaun sosiál ferik-katuas no ema ho defisiénsia neʼebé sei simu pagamentu liuhusi Banku Nasional Komėsiu Timor-Leste (BNCTL, sigla portugés) hamutuk 97.139, Banco Nacional Ultramarino (BNU) 222, Bank Republik Indonesia (BRI) 226 no Banku Mandiri 57.
Benefisiáriu neʼebé iha ona konta bankária liuhosi Automated Teller Machine (ATM) P24 hamutuk 15.249 no benefisiáriu ne’ebé simu pagamentu ho konta bankária direta hamutuk 82.395.
Aleinde ne’e, INSS rejista benefisiáriu pensaun sosiál foun hamutuk 1.406 iha janeiru to’o marsu 2024, ne’ebé husi númeru ne’e benefisiáriu ne’ebé rejistu iha banku hodi loke ona konta bankária hamutuk 119 no benefisiáriu ne’ebé seidauk loke konta bankária 1.287
Jornalista : Arminda Fonseca
Editora : Julia Chatarina
