EKONOMIA, BOBONARO, HEADLINE, MUNISÍPIU

Administradora Postu Vemasse preokupa komunidade halo uma iha natar

Administradora Postu Vemasse preokupa komunidade halo uma iha natar

Administradora Postu Administrativu Vemasse, Elda Maria Vegas de Sousa Freitas. Imajen espesiál.

BAUCAU, 10 juñu 2024 (TATOLI) – Autoridade Postu Administrativu Vemasse preokupa ho komunidade ne’ebé kontinua halo uma privada iha área produtivu hanesan natar laran.

Administradora Postu Administrativu Vemasse, Elda Maria Vegas de Sousa Freitas, esplika, komunidade iha suku Vemasse Tasi ne’ebé hahú fa’an rai no konstrui uma iha área produtivu liuliu natar sira-ne’ebé konsideradu nu’udar fatin agrikultura.

“Ita halo uma agora normalmente futuru ita lakon buat barak, tanba ne’e konstrusaun permanente labele halo ona ba natar,” Administradora Postu Administrativu Vemasse hateten iha Baucau, segunda ne’e.

Suku Vemasse Tasi nu’udar área potensiál ba natar tanba bainhira utiliza hodi kuda haree sei fó benefísiu ekonomia no rendementu ba komunidade maibé komunidade balun fa’an ona rai ba empreza sira hodi konstrui uma nune’e fo impkatu ba setór produsaun agríkola iha Vemasse.

Área ne’ebé hahú konstrui uma hanesan parte eskola to’o Carabela ne’ebé tuir kalkulasaun besik uma-30 mak identifika konstrui iha natar laran ne’ebé parte Autoridade Postu rekolla komunidade fa’an ba empreza sira hodi halo investimentu ba setór seluk.

“Rai potensiál sira ita halo fali uma iha laran sei la fo retornu ba ita, tanba ne’e ami trata hela asuntu ne’e,” Elda Freitas akresenta.

Autoridade Postu hamutuk ho Autoridade suku sei esforsu hamutuk hodi fo hanoin no enkoraja komunidade hotu atu labele fa’ann no halo uma ba natar iha área referida maibé kontinua utiliza hodi halo natar.

Postu Administrativu Vemasse iha tótal natar ektare 2.422 kompostu husi Suku Uaigae ektare 40, Uatulari 55, Ostiku 100, Kaikua 110, Ossouala 112, Loilubu 80 no Vemasse Tasi hamutuk esktare 1.925.

Jornalista   : Natalino Belo 

Editór         : Evaristo Soares Martins 

iklan
iklan

Leave a Reply

iklan
error: Content is protected !!