iklan

HEADLINE

Empreza BTK reabilita katedrál Dili atinje ona 80%

Empreza BTK reabilita katedrál Dili atinje ona 80%

Prosesu reabilitasaun Igreja Katedral Díli, tersa (11/06). Imajen Tatoli/Francisco Sony.

DILI, 10 juñu 2024 (Tatoli)–Eempreza Bhakti Timor Karya (BTK) Unipesoál, Lda, ne’ebé halo reabilitasaun ba igreja Katedrál Dili atu simu Papa Francisco hala’o vizita pastorál iha Timor-Leste, daudaun ne’e atinje ona 80%.

Notísia Relevante: Katedrál Dili sei reabilita durante fulan-neen

“Iha momentu ne’e reabilitasaun hahú tiha ona iha fulan Fevereiru tinan ida ne’e, agora to’o ona besik meiadu juñu, reabilitasaun ne’e la’o dadaun ona no kuaze iha ona ninia finalizasaun, entaun ita bele dehan 80% ona mai iha reabilitasaun ne’e,” Pároku igreja Katedrál Dili, Paulos Maia, hatete ba gência Tatoli iha Katedrál, Vila Verde.

Prosesu reabilitasaun Igreja Katedral Díli, tersa (11/06). Imajen Tatoli/Francisco Sony

Nai-lulik ne’e hateten, vizita delegasaun Vatikanu nian mai halo avaliasaun ba preparasaun igreja no Governu timorense nian, ekipa delegasaun ne’e rekomenda atu konstrui rampa ba iha subida altar nian iha Katedral, atu nune’e Amu Papa Francisco bele ba ho kadeira roda.

“Iha rekomensaun ne’e la signifikativu, maibé sira husu de’it atu halo rampa hanesan dalan ida atu Amu Papa liu sa’e ba iha Altar nian. Tanba ita hotu hatene Papa ho kadeira roda, ne’ené hosi kadeira roda ne’e tenke dudu sa’e ba, tanba amu Papa la la’o. Ne’e rekomendasaun ida hosi Vatkanu husu. Bu’at sira seluk laiha,” nia hateten.

Katedrál Dili hanesan sítiu ida-ne’ebé Papa Francisco sei vizita, hanesan igreja inan ne’ebé obrigatoriamente amu Papa Farncisco tenke mai tana ida-ne’e hanesan objetu Papa vizita Timor-Leste.

Nia haktuir, ema hotu hatene katak ho vizita Amu Papa Francisco ninian mak Governu no igreja hare katak kondisaun igreja katedrál rasik dezde ultimamente ninia reabilitasaun iha 2008 no 2009.

“Maibé, liu tiha tinan10-resin seidauk halo reabilitasaun, entaun aproveita ho vizita Amu Papa nian ne’e halo reabilitasaun igreja ida-ne’e,” nia dehan.

Pároku garante empreza BTk sei halo revizaun ida di’ak, kuandu obra reabilitasaun atinje 90% atu bele hadi’a buat balun ne’ebé presiza hadi’ak no halo kompletu.

Tuir observasaun Agência Tatoli, obra iha nia finalidade tanba traballador sira hosi empreza BTK hamoos hela banku no janela hodi pinta foun no halo hela konstrusaun adisionál ba katedrál nian.

Prosesu reabilitasaun Igreja Katedral Díli, tersa (11/06). Imajen Tatoli/Francisco Sony

Antes ne’e, planu konstrui katedrál Dili hahú iha tinan 1984 no Governu Indonézia [momentu okupasaun rezime Soeharto ne’e, Timor-Timur sai hanesan provinsia 27 entre povinsia seluk iha Indonézia] aloka orsamentu $235.000 atu konstrui katedrál ida-ne’e iha rai ho nia luan metru 10.000, ho medida metru 1.800 no bele akumula sarani sira hamutuk ema 2.000.

Ofisialmente, Prezidente Negara Kesatuan Republik Indonesia (NKRI), Soeharto, inaugura  Katedrál foun iha Dili-Timor-Timur ho ninia mahein Imaculada Conceição ne’e iha loron 02 novembru 1988, no konsidera hanesan katedrál boot liu iha Sudueste Aziatiku. Serimónia inaugurasaun ne’e akompañadu husi Bispu Administradór Apostoliku Dili, Dom, Carlos Filipe Ximenes Belo “Amu Belo”, SDB.

No, iha loron 12 outubru 1998, bainhira amu Papa João Paulo II mai vizita Timor-Timur (atuál Timor-Leste, Papa João Paulo II mós inaugura igreja Katedrál Imaculada Conceição iha Dili-Vila Verde.

 Jornalista : Jesuína Xavier

Editór        : Cancio Ximenes

iklan
iklan

Leave a Reply

iklan
error: Content is protected !!