RAEOA presiza Guarda Floresta 20 hodi monitoriza área protejida
OÉ-CUSSE, 10 juñu 2024 (TATOLI) – Departamentu Floresta iha Rejiaum Administrativa Espesiál Oé-Cusse Ambeno (RAEOA), presiza Guarda Floresta Komunitária ho totál na’in-20 hodi monitoriza área protejida iha rejiaun referida.
Xefe Departamentu Floresta iha Diresaun Rejionál Agrikultura, Marcos Sufa Colo, argumenta, guarda floresta komunitáriu na’in-20 ho objetivu atu kontrola área protejida sira iha Rejiaun Adminitrativa Espesiál Oé-Cusse Ambeno (RAEOA).
Tuir nia, tanba antes ne’e identifika ona fatin neen bazea Dekretu-Lei nú. 5/2016 kona-bá sistema nasionál área protejida, hanesan Monte-Kutete, Usmetan, Ek-Oni, Oébatan, Manuleo no Manggal Citrana no fatin haat identifika ona atu integra ba área protejida mak Nakome, Fifna, Oépoto no País no Puas.
“Maibé kona-ba pesoál atu tau matan ba área protejida ne’e seidauk iha, tanba daudaun ne’e seidauk iha rekrutamentu atu asegura fatin sira-ne’e, ami koloka guarda floresta postu sira mak kobre hotu área protejida sira, no guarda movél atu apoia ba suku sira,” Marcos Sufa Colo, ko’alia iha Oé-Cusse, segunda ne’e.
Nia fó sai, guarda floresta iha postu Oésilo na’in-haat, iha Pássabe na’in-ida atu kobre suku Malelat ho suku Abani, iha Nítibe na’in-tolu no iha Pante Makasar na’in-haat.
Xfe Departamentu Floresta mós destaka ekipa movél hamutuk na’in-lima ho funsaun atu apoia guarda postu sira atu atende iha nível suku no aldeia.
“Ita sei presiza na’in-20, ne’e ba guarda komunitária atu tau matan ba área protejida sira, tanba iha área aprotejida sira-ne’e, iha rekursu naturál barak, hanesan Ai-kameli, kakatua, rusa, nehek-teen, (kutulak),” nia dehan.
Notísia relevante:RAEOA implementa ona lei sistema nasionál área protejida
Antes ne’e, Autoridade RAEOA liuhusi Sekretária Rejionál ba Asuntu Agrikultura, implementa ona dekretu-lei nú. 5/2016 kona-bá sistema nasionál área protejida.
Fatin neen mak mak identifkadu ona ho totál ektare rihun 35 iha suku neen, maka hanesan iha sub-rejiaun Pante Makasar identifika iha suku Costa, foho Kutete ektare 9,525, suku Taiboko identifika iha Usmetan ektare 1,353.
Iha sub-rejiaun Nítibe identifika iha suku Suni-Ufe iha Oá-Batan, suku Bene-Ufe identifika iha Manggal Citrana ektare 455, no foho Manuliu Bi’iele ektare rihun 30.
Notísia relevante: MAP kapasita guarda floresta 37 iha Oé-Cusse asegura área protejida
Jornalista: Abílio Elo Nini
Editór: Evaristo Soares Martins
