MAP kapasita guarda floresta 37 iha Oé-Cusse asegura área protejida
OÉ-CUSSE, 18 jullu 2023 (TATOLI) – Ministériu Agrikultura no Peska (MAP) liuhosi Diresaun Nasionál Konservasaun Turizmu, fasilita formasaun ba guarda floresta na’in-37 iha Rejiaun Administrativa Espesiál Oé-Cusse Ambeno (RAEOA) atu haforsa kontrolu ba área protejida sira iha territóriu Oé-Cusse.
Notísia relevante: RAEOA sei persiza tán guarda floresta hodi reforsa kontrolu iha área protejida
Diretór Rejionál Agrikultura, Cirilo dos Remedios Baba, hateten, formandu 37 ne’e mai hosi korpu guarda floresta no guarda floresta komunitária, hetan formasaun hosi MAP durante loron tolu, hahú hosi 13 to’o 15 jullu.
“Formasaun ne’e nia objetivu atu eleva koñesimentu no abilidade serbisu guarda floresta sira, tanba sira maka loron hamutuk ho komunidade iha baze, entaun presiza kapasita sira oinsá atu asegura produtu floresta sira, liuliu área protejida, área tara-bandu no área komunidade iha territóriu RAEOA,” Cirilo Baba, hateten iha Oé-Cusse, tersa ne’e.
Diretór ne’e esplika, dadus ein-jerál, ne’ebé diresaun agrikultura rejista, númeru ai-laran iha RAEOA menus, tán ne’e mak presiza aumenta rekursu atu nune’e bele asegura no proteje ai-laran sira-ne’ebé tama ona ba área protejida.
“Durante ne’e ita destaka ona guarda floresta komunitáriu iha área protejida haat ne’ebé hodi kontrola sasán rikusoin iha ai-laran, hanesan animál fuik hanesan bibi-rusa no seluk tán ne’ebé halo movimentu iha área komunidade, liuliu entre área protejidu sira hanesan Manggal Citrana no Monte Manuleu iha sub-rejiaun Nítibe,” nia katak.
Nune’e Diresaun Rejionál Agrikultura serbisu hamutuk ho Ministériu Agrikultura no Peska, realiza formasaun hodi fokaliu ba papél responsabilidade, prosesu apreensaun ba produtu floresta, ekipamentus ilegál no tesi ai arbiru.
Notísia relevante: RAEOA implementa ona lei sistema nasionál área protejida
Nune’e mós dezenvolve to’os permanente ba redusaun muda to’os hadi’a rai bokur no aplika sistema agrikultura integradu, produsaun viveiru liga ba ai produsaun ka indústria, kuda no proteje ai produsaun iha área tara-bandu no área konservasaun bee-matan sira.
“Matéria ne’ebé hetan iha formasaun ne’e ida maka oinsá utilizasaun floresta define floresta (hutan), instituisaun floresta, utilizasaun floresta direta no indireta, utilizasaun ai-laran, área protejida no floresta iha parte rua, rai maran no tasi,” nia afirma.
Nune’e mós matéria aprezentasaun kona-ba Lei númeru 14/2017, loron 02 fulan-agostu, rejime jerál ba floresta sira, basia idrografika, inklui prosedimentu lisensiamentu kado no tesi ai, autorizasaun legalidade, relatóriu, tékniku sukat ai-moris no ai-mate.
Notísia relevante: Agrikultura RAEOA identifika Rusa-Kakatua kontinua eziste iha área protejida Ek-Oni no Citrana
Jornalista: Abílio Elo Nini
Editór: Evaristo Soares Martins
