DILI, 12 juñu 2024 (TATOLI) – Ministru Negósiu Estranjeiru no Kooperasaun (MNEK), Bendito Freitas, informa fulan oin, Estadu Inglaterra deporta imigrante sira husi nasaun Ázia no Áfrika hamutuk 500, husi totál númeru ne’e timoroan na’in-50.
“Agora ita hasoru situasaun difisíl iha Inglaterra, ita nia Embaixada iha ne’ebá servisu maka’as hela, maibé iha 07 Jullu Inglaterra deporta imigrante hamutuk 500 husi nasaun sira iha Ázia no Áfrika inklui timoroan 50,” Ministru Bendito katak ba jornalista sira Palásiu Prezidensiál Dili, kuarta ne’e.
Ministru ne’e dehan, daudaun ne’e Inglaterra hasai ona regra ne’ebé regirozu hodi halo kontrolu másimu ba traballadór imigrante sira.
Timoroan na’in-50 ne’ebé sei deporta fila mai Timor-Leste tanba durante ne’e utiliza passaporte Timor-Leste hodi hala’o servisu ilegál iha Inglaterra.
Nune’e ba oin Estadu Inglaterra sei buka tuir nafatin imigrante sira ne’ebé servisu iha Reinu Unidu ho ilegál.
Jornalista: Hortencio Sanchez
Editór : Florencio Miranda Ximenes
