iklan

EKONOMIA, HEADLINE

Sentru viveiru ida iha Gleno labele halo produsaun ikan ho di’ak

Sentru viveiru ida iha Gleno labele halo produsaun ikan ho di’ak

Tanke haki'ak ikan Nila, Imajen/Tatoli Egas Cristovao

DILI, 12 Juñu 2024 (TATOLI) – Sentru viveiru ikan ida ne’ebé lokaliza iha aldeia moris foun, suku Talimoro-Gleno, munisípiu Ermera, labele halo produsaun di’ak, tanba kolan tolu ne’e eziste iha sentru ne’e hetan estragu kauza husi rai nakfera.

Diretór Servisu Agrikultura munisípiu Ermera, Marcos Martins, hateten eziste sentru viveiru ikan haat ho tanke 13, maibé iha sentru ida ho nia tanke tolu mak danifika kauza husi rai nakfera.

“Ha’u bá haree ona kondisaun fatin iha sentru viveiru ida ne’e. Tanke sira ne’e maka ladún di’ak ona no seidauk hetan apoiu husi nasionál”, Marcos Martisn dehan via telefone, ohin.

Nia salienta katak Ministériu Agrikultura presiza hadi’a tanke tolu ne’e atu kontinua prodús ikan hodi fornese ba populasaun sira, tanba sentru ne’e nia lokalizasaun mak iha fatin ne’ebé risku ba dezastre naturál.

“Tanba ne’e, tenke iha orsamentu própriu hodi halo manutensaun ho lalais. Espera katak sentru ne’e bele hetan atensaun lalais, nune’e bele prodús ikan barak liután, tanba ikan Nila sira ne’ebé hakiak iha sentru ne’e ikan monosex de’it, katak ikan sira ne’e mesak aman de’it no kuandu boot ona mak tau hamutuk ho ikan inan hodi halo produsaun”, realsa.

Iha sorin seluk Diretór-Jerál Peska, Akikultura no Jestaun Rekursu Akuátiku, Celestino Barreto, haktuir katak sentru ida ne’ebé afetadu ba dezastre naturál ne’e nia konstrusaun mak ladún iha kualidade, bee iha tanke sira bainhira enxe tun hotu ba rai, entaun halo ikan oan sira labele halo produsaun ho di’ak.

“Kolam tolu ho medida 20×10 maka nakfera maka’as. Tanba ne’e, ita-nia ekipa serbisu iha baze halo ona intervensaun hodi buka meiu atu halo fali manutensaun. Sira halo ona levantamentu dadus depois relata mai mak foin bele hatene nia estimativa orsamentu hira foin bele aloka verba ba reabilitasaun iha kolam tolu ne’e”, adianta.

Notísia relevante: Sentru Viveiru Mugis prepara fini ikan rihun 15 atu distribui ba komunidade

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!