iklan

EDUKASAUN, BOBONARO, MUNISÍPIU

EBC Dom Caileto presiza tán profesór na’in-hitu

EBC Dom Caileto presiza tán profesór na’in-hitu

Diretór Dom Caileto, Daniel da Cruz. Imajen Tatoli/Sérgio da Cruz.

BOBONARO, 13 juñu 2024 (TATOLI) – Ensinu Báziku Sentrál (EBC, sigla portugés) Dom Caileto, suku Bobonaro, postu administrativu Bobonaro, munisípiu Bobonaro, presiza tán profesór na’in-hitu atu reforsa ensinu no aprendizajen ba estudante sira, tanba la hetan kolokasaun profesór foun ne’ebé selesionadu iha vaga bolsa kandidatura profesór husi Ministériu Edukasaun.

Diretór EBC Dom Caileto, Daniel da Cruz, informa, daudaun ne’e prosesu ensinu no aprendizajen ladún la’o ho normál, tanba matéria portugés, inglés, matemátika no siénsia naturál ba terseiru siklu profesór laiha inklui profesór turma primeiru no segundu siklu na’in-rua mós tama ona idade reforma.

Notísia relevante: EBC Dom Caileto prenxe valór ezame ho surat-tahan

“Ami presiza tán profesór na’in-hitu atu prienxe aula no matéria ne’ebé durante ne’e mamuk, tanba ida-ne’e sai problema boot mai ami. Ezemplu matéria ida matemátika ne’e ema ida de’it mak lori husi sétimu-anu ba to’o nonu-anu, entaun hakarak ka lakohi nia tenke hanorin 45 oras pur semana, loloos ne’e tuir kurríkulu 24 oras pur semana de’it, entaun presiza aumenta tán profesór,” nia ko’alia iha Bobonaro, kinta ne’e.

Dirijente eskola ne’e haktuir, problema ne’e akontese kedas dezde 31 dezembru 2023 liubá tanba Ministériu Edukasaun deside hapara profesór na’in-hitu iha eskola referida no foin lalais ne’e EBF balun mak hetan kolokasaun profesór foun bolsa kandidatura 2024, enkuantu sentru EBC Dom Caileto la hetan.

“Profesór ida foin lalais kolokadu mai ne’e, nia husi Baucau monu iha EBF Kaboke, nia jurusan ingles, entaun ho inisiativa maske la hetan kolokasaun, ami sentru foti desizaun profesór ne’e mai fali iha sentru hanorin inglés, nia hanorin foin semana ida,” nia katak.

Nia rekomenda ba Ministériu Edukasaun atu buka solusaun tanba problema ne’e afeta maka’as ba prosesu ensinu no aprendizajen kada loron.

“Ida turma ne’ebé profesór sira laiha ne’e, sira mai halimar de’it, depois halimar hotu simu merenda eskolár hotu sira fila, dalaruma ami uza meiu balu dada mai fali koordenador pre-eskolár no profesór voluntariu ida, haruka sira na’in-rua prienxe fali oras dadeer nian, hanorin terseiru-anu, tanba terseiru-anu ne’e ho totál estudante 40-resin maibé profesór laiha,” nia hateten.

Enkuantu EBC ne’e akumula estudante husi primeiru to’o terseiru-siklu ho totál na’in-372 no totál profesór inklui gabinete diretór hamutuk na’in-20.

Notísia relevante: Edukasaun Bobonaro koloka profesór 67 ba eskola 43

Jornalista   : Sérgio da Cruz
Editór         : Evaristo Soares Martins

iklan
iklan

Leave a Reply

iklan
error: Content is protected !!