iklan

EKONOMIA, BOBONARO, HEADLINE, MUNISÍPIU

Edifísiu foun BNCTL Sukursál Maliana inauguradu

Edifísiu foun BNCTL Sukursál Maliana inauguradu

Serimónia inaugurasaun edifísiu fou Banku Sentrál Komérsiu Timor-Leste (BNCTL ) Sukursál Maliana, munisípiu Bobonaro. Imajen Tatoli/Sérgio da Cruz.

BOBONARO, 14 juñu 2024 (TATOLI)-Banku Nasionál Komérsiu Timor-Leste (BNCTL, sigla portugés), hamutuk ho Banku Sentrál Timor-Leste (BCTL, sigla portugés) no Parlamentu Nasionál, sesta ne’e inaugura edifísiu foun BNCTL sukursál Maliana, munisípiu Bobonaro ne’ebé lokaliza iha aldeia Rai-Maten, suku Odomau.

Prezidente Konsellu Administrasaun Banku Nasionál Komérsiu Timor Leste (BNCTL, sigla portugés), Lúcia da Cruz Flo, esplika, edifísiu foun sukursál Maliana ne’e sai hanesan kompromisiu BNCTL nian hodi oferese servisu finanseira ne’ebé asesivel no kualidade ba kliente sira.

Notísia relevante: BNCTL hahú konstrui edifísiu foun sukursál Maliana

“Ami hakarak ho másimu atinje bein-estar ba ita-nia populasaun hotu, la’ós iha Maliana de’it, maibé iha munisípiu sira seluk ne’ebé ami estabelese ona, ami espera ita hotu la’o hamutuk ho BNCTL bodi ajuda ita-nia ekonomia nasionál,” nia akresenta.

BNCTL mós hakarak apresia empreza lokál ne’ebé responsabiliza obra ne’e tanba finaliza tuir kontratu ne’ebé iha no hatudu rezultadu kualidade.

Vise Prezidente Parlamentu Nasionál, Deputadu Alexandrino Afonso Nunes, orgulu ho esforsu ne’ebé BNCTL halo no konsidera ho estabelesimentu edifísiu sukursál foun ne’e nu’udar meiu ida hodi promove atividade komersiál no industriál ho objetivu atu promove no insentiva investimentu iha nível lokál, nasionál no rejionál entre munisípiu Bobonaro no provínsia Kupang, nível nasionál entre Timor-Leste ho Indonézia no nasaun sira seluk.

“Ita hotu hatene katak jeografikamente munisipiu Bobonaro lokaliza iha fronteira entre Timor-Leste ho Indonézia, tanba ne’e importante tebes ba estadu Timor-Leste atu kria kondisaun servisu adekuadu, infraestrutura ho kualidade no kuadru legál atualizadu hodi viabiliza atividade komersiál no industriál iha fronteira nasaun ida-ne’e, nune’e timoroan sira hotu, partikularmentd Bobonaro oan sira bele hola parte ativamente iha prosesu dezenvolvimentu ekonomia ba nasaun,” nia hateten.

Sekretáriu Komisaun D Parlamentu Nasionál, Deputadu Saul Salvador Amarál, informa, momentu ne’e sai nu’udar pasu signifikativu ida iha dezenvolvimentu ekonómiku no sosiál iha Timor-Leste, espesialmente munisípiu Bobonaro.

“Ita hotu hein katak sukursál ne’e sei permite atendimentu di’akliu ba ita-nia sidadaun no emprezáriu lokál sira, partikularmente sidadaun munisípiu Bobonaro, fiar katak rezisténsia sukursál foun sei fasilita asesu ba kréditu, promove inkluzaun finanseira no sei insentiva emprendedorizmu ne’ebé ke sai hanesan pilár esensiál ba kresimentu ekonómiku sustentável,” nia katak.

Governadór Banku Sentrál Timor-Leste (BCTL, sigla portugés), Helder Lopes, husu ba BNCTL atu Kontinua habelar servisu ba to’o baze liu-liu halo espansaun kreditu ba komunidade sira.

“Ohin BNCTL hateten ona sira-nia servisu iha munisípiu Bobonaro foin fó kréditu besik milaun $15, espera ho inaugurasaun ne’e, tinan rua ka tolu ita mai fali ita-boot sira-nia espansaun kréditu aumenta,” nia akresenta.

Prezidente Autoridade Munísipiu Bobonaro, Alexandrino Pires, kongratula BNCTL ne’ebe konsege dezenvolve ona sekursál Maliana.

“Ha’u nu’udar Prezidente Autoridade fó prioridade tebes ba banku, tanba dezenvolvimentu labele separa husi banku ninia kontribuisaun, banku sai pilár importante iha munisípiu Bobonaro,” nia esplika.

Enkuantu obra ne’e konstrui husi empreza lokál tolu hanesan Kevkel, Ely Karya no Rai-Mean ho totál millaun ida-resin.
Notísia relevante: Projetu edifísiu BCNTL Maliana atinje 20%

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!