Projetu edifísiu BCNTL Maliana atinje 20%
MALIANA, 16 Juñu 2023 (TATOLI) – Projetu edifísiu foun Banku Nasionál Komsérsiu Nasionál Timor-Leste (BNCTL, sigla portugés) sukursál Maliana, ne’ebé lokaliza iha aldeia Rai-Maten, suku Odomau, postu administrativu Maliana, munisípiu Bobonaro, progresu fizíku atinje ona 20%.
Diretór Kompañia Elikarya, José Pires, haktuir obra ne’e lansa iha fulan-dezembru 2022 no hahú konstrusaun iha fulan-marsu tinan 2023.
Notísia relevante: BNCTL hahú konstrui edifísiu foun sukursál Maliana
“Agora daudaun uma ba seguransa nian hotu ona, uma ki’ik ida fali mós hotu ona, uma boot ne’e mós komesa ninia pondasi, lantai ne’e hotu ona, agora komesa fali hahú ho ninia tian ne’ebé ninia progresu ne’e to’o ona 20%,” nia imforma ba jornalista sira, iha Holsa, sesta ne’e
Maske implementasaun projetu ne’e hasoru difikuldade ho rekursu badaen nian, maibé serbisu la’o durante fulan tolu ne’e hatudu progresu di’ak tebes.
Emprezáriu ne’e subliña, pakote serbisu hahú hosi fondasi to’o hada batako sei responsabiliza hosi traballadór timoroan sira, maibé iha faze finalizasaun obra ne’e sei uza fali traballadór estranjeiru.
“Atu nune’e bele menjaga ninia kualidade ho ninia mutin pekerjaan ne’e, ninia materiál sira-ne’e besi ho simentu bele mai hosi Dili, bele mai hosi Atambua. Ida-ne’e mk ami presiza, ami hola tuir ninia espesifikasaun iha dezeñu ne’e,” nia katak.
Enkuantu molok hahú obra ne’e konsege hetan impedimentu hosi komunidade, maibé José Pires, katak durante ne’e kooperasaun entrega empreza konstrutora, autoridade lokál no komunidade sira la’o ho di’ak tebes.
Entretantu obra ho durasaun kontratu tinan ida, responsabliza hosi empreza konstrutora na’in-tolu komposta hosi Ely Karya Unip Lda, Kevkel no Rai-Mean Unip Lda ho valór projetu millaun $1-resin ($1.001,166.92).
Notisia relevante: MEJD-BNCTL realiza akordu transferénsia osan ba konstrusaun eskola 117
Jornalista : Sergio da Cruz
Editór : Evaristo Soares Martins
