iklan

COVALIMA, HEADLINE

Alfándega apreende kamioneta ida ne’ebé tula sasán merkadoria iha fronteira Mota-Masin

Alfándega apreende kamioneta ida ne’ebé tula sasán merkadoria iha fronteira Mota-Masin

Alfándega apreende kamioneta ida ne’ebé importa sasán merkadoria iha fronteira Mota-Masin.

COVALIMA, 19 Juñu 2024 (TATOLI)-Servisu Alfándega iha fronteira Mota-Masin halo apreensaun ba kamioneta ida ne’ebé tula sasán merkadoria ho dalan ilegál ka latama iha lista kompra.

Apreensaun ba produtu importadu halo iha loron 18, pur volta tuku 16:00, bainhira Alfándega iha Postu Integradu fronteira Mota-Masin, iha postu administrativu Tilomar, munisípiu Covalima, simu informasaun husi servisu informasaun nian.

Diretór Alfándega Fronteira Mota-Masin, Nuno Nogueira, informa katak bazeia ba informasaun ne’ebé simu katak kamioneta ne’ebé importa sasán illegál ho xapa matríkula DH 8660 JC husi Indonézia.

Sasán importadu ne’ebé la tama iha lista kompra.

Sasán merkadória ne’ebé laiha lista kompra hamutuk kaixa 892, hanesan Teh Pucuk kaixa 110, Coca-Cola no Sprite kaixa 240, bebida vitamina C kaixa 1000 no bebida rasa orange kaixa 542.

Atu aplika multa ba empreza ne’ebé komete irregularidade ne’e nia prosesu lori tempu to’o loron haat, tanba presiza identifika sasán no nia prosesu uza manuál no fó impaktu ba sidadaun ne’ebé sobu sasán iha kamioneta laran, tanba sasán balun todan hanesan simentu, kaixa aquase no seluk tan.

“Atu aplika multa, Alfándega presiza retifika lista kompra liuhusi sistema hodi aplika taxa normál hafoin sistema mak sei aplika tan multa ba kompañia ne’ebé importa sasán merkadória ne’ebé laiha lista kompra, tanba Alfándega aplika taxa normál 5%”, nia esplika.

Molok ne’e, iha 10 Maiu, Ministra Finansa, Santina Cardoso, lansa ona mákina mobile raiu-xís iha Postu Integradu Mota-Masin, maibé daudaun ne’e seidauk bele uza, tanba presiza atu kapasita uluk funsionáriu Alfándega hodi bele opera mákina ne’e.

Notísia relevante: Governu lansa mákina raiu-xís iha fronteira Mota-Masin

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!