iklan

INTERNASIONÁL, DESPORTU, DILI, HEADLINE

MJDAK fó formasaun anti-doping ba jogadór selesaun nasionál

MJDAK fó formasaun anti-doping ba jogadór selesaun nasionál

Imajen/espesial

DILI, 19 juñu 2024 (TATOLI) – Ministériu Juventude Desportu Arte no Kultura (MJDAK) liuhusi  Komisaun Nasionál Desportu (KND) realiza formasaun anti-doping, durante loron rua,  ba jogadór selesaun nasionál U-16 no U-19 iha Salaun Xanana Sport Centre Bairru dos Gruilhos Dili.

“Atividade ne’e fahe ba parte rua, ida halo semináriu baibain no ida fó formasaun. Iha seminariu ita partilla de’it ba jogadór sira kona-ba saida mak anti-doping, tanba saida mak atleta sira labele konsumu arbiru doping durante kompete iha eventu nasionál no internasionál sira, kona-ba formasaun nian ita fó materia espesifiku ba sira kona-ba anti-doping ne’ebé fó sai ona husi ajénsia mundiál anti-doping,” Sekretariu Ezekutivu KND, Cesarino da Silva,  hatete ba Agência TATOLI, kuarta ne’e.

Formasaun ne’e hala’o hahú horiseik no ohin fahe ba kategoria rua, iha loron primeiru ba selesaun U-16 ne’ebé prepara atu ba kompete iha jogu Asian Football Federation (AFF) ne’ebé sei realiza iha Indonézia semana oin no loron segundu ba selesaun nasionál U-19 ne’ebé sei ba kompete mós iha eventu Asian Football Confederation (AFC) ne’ebé realiza fulan oin iha Surabaya Indonézia.

“Sira U-16 horiseik ita fó de’it hanesan semináriu hodi esplika kona-ba oinsa mak labele utiliza doping, maibé ba sira U-19 ita fó formasaun no hotu ita atribui kedan sertifikadu anti-doping nian ba sira. Tanba ita hatete agora ne’e ai-han barak ba jogadór sira balun utiliza ho doping, entaun formasaun ne’e fó ba sira atu sira bele iha koinesimentu kona-ba ai-han ne’ebé sira bele haan no ida ne’ebé mak sira labele haan, iha materia ne’ebé ami fó ba sira kompletu tebes tuir saida mak Ajénsia Internasionál anti-doping fó sai,” nia katak.

Jogadór ne’ebé partisipa iha formasaun no semináriu ba anti-doping ne’e hamutuk 40-resin kompostu husi U-16 no U-19.

Entertantu, Diretór Tékniku Federasaun Futeból Timor-Leste (FFTL), Gaspar Quintão agradese ba MJDAK ne’ebé realiza ona formasaun no semináriu ba anti-doping ba jogadór selesaun nasionál.

“Agradese tebes ba MJDAK tanba iha inisiativa di’ak hodi fó ona formasaun anti-doping ba ita nia jogadór sira. Ida ne’e importante tebes tanba agora ne’e regra rigurozu tebes, bainhira identifika jogadór ruma utiliza doping hetan kedan sansaun ba jogadór ne’e bele fó impaktu ba ekipa,” Gaspar katak.

Jornalista: Hortencio Sanchez

Editór     : Florencio Miranda Ximenes

iklan
iklan

Leave a Reply

iklan
error: Content is protected !!