Top

Governu sosa no instala ona mákina imprensaun ba passaporte

Ministru Justisa, Sergio Hornai. Foto Tatoli/António Daciparu

DILI, 21 juñu 2024 (TATOLI)– Ministru Justisa (MJ), Sergio Hornai, informa, Governu sosa ona no halo ona instalasaun ba mákina prodús passaporte hamutuk rua hodi bele fasilita sidadaun sira halo passaporte.

“Ita hola ona mákina passaporte rua no agora iha hela faze instalasaun, nune’e bele kompleta tuir dever no obrigasaun hodi atende sidadaun sira ne’ebe hakarak halo passaporte ho di’ak liutan,” Ministru ne’e hatete ba jornalista sira iha Palásiu Governu Dili, sesta ne’e.

Notisia relevante: Notariadu hapara provizóriu emisaun Passaporte

Ministru ne’e dehan, Governu foti desizaun sosa tan mákina rua tanba mákina rua antes ne’e avaria.

“Ita halo esforsu hotu atu rezolve, ne’e mak sosa ona mákina rua halo ona instalasaun nia sistema sira atu halo konetividade ba ita nia sistema ne’ebé antes ne’e iha ona,” Ministru ne’e tenik.

Molok ne’e, Governu liu husi desizaun Konsellu Ministru prevé ona orsamentu ho millaun $2 hodi halo akizisaun ba mákina rua hodi halo impresaun passaporte nian.

Ho nune’e MJ halo kedan kontratu ho Empreza Theles husi Singapura atu halo kompra  mákina ba imprensaun passaporte. Akizisaun ba mákina imprensaun passaporte halo iha Filándia no akizisaun ne’e lori tempu naruk, maibé daudaun iha ona faze instalasaun.

Akizasaun ba mákina rua ne’e presiza tempu naruk duni tanba sei haree didi’ak sasan sira ne’e ho kapasidade, matenek atu labele iha interupsaun iha operasionál liga ba produsaun passaporte.

“Ida-ne’e mak esforsu Governu nian, mak husu ba populasaun tomak atu pasiénsia tanba liga ba mákina imprensaun passaporte ne’e presiza duni tempu atu haree ho neneik no presiza haree didiak atu labele iha interupsaun iha operasionál liuliu liga ba produsaun passaporte”, nia konklui.

Notisia relevante:Ministériu Justisa aloka millaun $2 halo akizisaun mákina produsaun passaporte

Jornalista: Hortencio Sanchez

Editor: Florencio Miranda Ximenes

Publisidade

Leave a Reply

Latest Post

error: Content is protected !!