DILI, 27 juñu 2024 (TATOLI)—Rede Feto Timor-Leste (RFTL), kinta ne’e, realiza formasaun ba membru rede feto 46 husi munisípiu 12 inklui Rejiaun Administrativa Espesiál Oé-cusse Ambeno (RAEOA) hodi prepara ba konferénsia munisipál no kongresu nasionál feto Timor-Leste ne’ebé sei realiza iha tinan ne’e.
Prezidente RFTL, Zélia Fernandes, hateten, formasaun ba membru Rede Feto sira ne’e importante tebes tanba sira mak sei sai fasilitadór iha konferénsia munisipál iha ida-idak ninia munisípiu, ne’ebé tuir data tentativa sei realiza fulan-jullu no agostu tinan ne’e.
“Bainhira konferénsia mosu, sira tenke bele identifika problema no solusaun iha plataforma asaun feto Timor-Leste, nune’e bele aprezenta fali iha kongresu nasionál feto Timor-Leste ba da-neen, ne’ebé tuir data tentiva sei hala’o iha fulan setembru ka outubru iha tinan ne’e,” Zélia Fernandes, informa, liuhusi konreferénsia imprensa, ne’ebé hala’o iha salaun RFTL, Caicoli, kinta ne’e.
Notísia relevante : SEII rekomenda Rede Feto investe iha kapasitasaun ba rekursu umanu
Formasaun ne’e sei hala’o durante loron-rua, hahú ohin no aban, preparasaun seluk ba kongresu nasionál ne’e ekipa mós hahú preparasaun halibur finansiamentu, fasilidade no materiál ba konferénsia nasionál no munisipál.
“Tuir planu orsamentu ne’ebé ita sei presiza ba iha atividade kongresu nasionál feto Timor-Leste no konferénsia munisipál hamutuk $3.000 resin,” nia tenik.
Jornalista : Arminda Fonseca
Editora : Julia Chatarina
