DILI, 17 janeiru 2024 (TATOLI)—Sekretária Estadu ba Igualdade (SEI), Elvina Sousa de Carvalho, rekomenda Rede Feto Timor-Leste (RFTL) atu investe iha kapasitasaun ba rekursu umanu.
“Ita rekoñese katak rede feto fó kontribuisaun ba halo advokásia ba feto liuliu ba igualdade, injustisa sira akontese iha komunidade nia leet. Tanba ne’e, Rede Feto importante investe kapasitasaun ba rekursu umanu mak hodi bele hadi’a jestaun, nune’e sai forte liután no bele promove igualdade iha Timor-Leste,” Sekretária Estadu ba Igualdade (SEI) hateten ba jornalista sira, hafoin partisipa ba Atividade Assembleia Membru Anuál (AMA) ho tema “Investe iha rekursu umanu, hodi haforsa igualdade, integridade no sustentável” iha salaun apuramentu Komisaun Nasionál Eleisaun (CNE), Colmera, kuarta ne’e
Prezidente Rede Feto Timor-Leste (RFTL), Zélia Fernandes, hateten kuarta (17 janeiru 2024) ohin, grupu hitu (7) mai aprezenta sira-nia relatoriu hodi diskute hamutuk no hetan apresiasaun.
“Ami ohin hahú halo Assembleia Membru Anuál ba asuntu rua. Dahuluk mak Konsellu Diretoriál aprezenta relatóriu programa no finansa ba tinan 2023. Daruak mak tuir estatutu simu membru foun, entaun ohin ne’e sira mai aprezenta no ita diskute hamutuk hodi hetan apresiasaun,” nia dehan.
Iha ne’e, organizasaun hitu (7) mak aplika hela atu sai membru Rede Feto no normalmente tuir estatutu Assembleia Membru Anuál mak sei apresia ka aprova foun.
Organziasaun foun hirak ne’e mak organziasaun Ema ho Defisiénsia nian ne’ebé lidera hosi Madalena da Silva, Organziasaun Asosiasaun Família das Kombatente (ASOFA, sigla portugés), Asosiasaun Mulher eis Parlamentár no organziasaun rua maihosi Oé-Cusse no organizasaun ida tan iha Dili.
Vise Prezidente Grupu Mulher Parlamentár Timor-Leste (GMPTL), Lucia Taeki, dehan grupu hitu ne’ebé hamahan-aan ona iha Rede Feto ne’e bele hakbiit liután kapasidade ne’ebé iha no ho objetivu ida de’it hodi tau-matan feto iha área oioin.
“Ha’u hakarak rekomenda feto maluk sira atu fó apresiasaun ba sira-nia relatóriu karik iha sujestaun ruma hodi hakbiit sira liuhosi ita-boot sira-nia tulun,” nia dehan.
Jornalista : Osória Marques
Editr : Cancio Ximenes
