iklan

NASIONÁL, INTERNASIONÁL, DESPORTU, DILI, HEADLINE

Boxista Elidio da Conceição husi klube El-Matador preparadu bá kompete iha Indonézia

Boxista Elidio da Conceição husi klube El-Matador preparadu bá kompete iha Indonézia

Imajen/Hortencio Sanchez

DILI, 03 jullu 2024 (TATOLI) – Treinadór Klube Boxe El-Matador, Abilio Orlando dos Santos, informa, Holywings Sport Show (HSS) husi Indonézia tau matan ona ba Boxista timoroan Elidio da Conceição no konvida Boxista ne’e atu ba kompete iha eventu ida ne’ebé sei realiza semana oin iha Indonézia.

“Promotór profisionál Boxe Indonézia nian mak fó ona tawaran ida ba ita nia Boxista Elidio atu ba kompete iha sira nia eventu HSS ne’ebé sei hala’o iha loron 14 Jullu,” Abilio hateten ba Agência TATOLI iha Tasi-Ibun Faról Dili, kuarta ne’e.

Imajen/Hortencio Sanchez

Tanba ne’e, Elidio ho nia ekipa sei aranka husi Timor-Leste bá Indónezia iha 11 Jullu no kompetisaun hahú 14 Jullu. Bainhira Elidio hatudu prestasaun di’ak mak HSS sei deside hola ona Elidio hodi ba joga iha Indonézia.

“Nia ba agora ne’e kategoria profisionál ona. Nia agora la amatir ona, nia sei joga hahú husi ronde dala-haat, futuru mai fali nia sei joga fali iha ronde dala-neen to’o ronde-12. Ita orgullu tanba El-Matador agora iha ona Boxista profisionál. Bá ida agora ne’e nia reprezenta Timor-Leste mak ba joga ne’e. Maibé Indonézia iha ona hanoin atu foti nia hodi joga iha sira nia klube, maibé ita sei haree lai atu halo negosiasaun tanba se nia joga ba oin atu reprezenta Indonézia ka Timor-Leste ida ne’e mak ita sei ko’alia,” Abilio tenik.

Daudaun ne’e, nia dehan El-Matador sei foku liu ba preparasaun Elidio nian oinsa ba kompete iha eventu ne’e ho susesu.

“Ami nia preparasaun la’o di’ak tanba ami nia patrosinadór Caltech mak durante ne’e suporta másimu loos ami, sira oferese fatin ba ami hala’o treinamentu, apoiu alimentasaun hanesan haan-hemu, deskansa iha Caltech nia fatin Ótel Ventura. Ami agradese tebes ba empreza Caltech, fiar katak futuru mai empreza sira iha Timor-Leste bele fó apoiu mós ami,” nia dehan.

Tuir oráriu ne’ebé iha Elidio sei kompete ho Boxista Indonézia Jepriko. Iha luta ne’e Elidio manán Boxista ne’e mak HSS sei kaer-metin kedan Elidio.

Atu arranka bá Indonézia sei hetan apoiu husi patrosinadór balun no El-Matador hato’o ona proposta balun ba Ministériu Juventude Desportu Arte no Kultura (MJDAK),hodi husu apoiu orsamentu maibé seidauk iha rezultadu pozitivu.

“Ami to’o agora seidauk iha osan ruma husi ami nia patrosinadór, maibé ami fiar iha tempu besik sira sei apoiu ami fundu ruma, maibé ami hato’o mós proposta ba MJDAK atu fó apoiu ami osan balun, maibé sira seidauk fó resposta mai ami, ami la hatene keta iha tempu besik sira fó apoiu karik ami hein de’it,” nia konklui.

Iha fatin hanesan, Boxista Elidio da Conceição, hateten sei hatudu jogu ne’ebé mak di’ak iha eventu ne’e hodi hamorin Timor-Leste nia naran.

“Ida ne’e ha’u nia responsabilidade, ha’u sei hatudu jogu ne’ebé di’ak atu hamorin ha’u nia rai doben Timor-Leste,” Elidio tenik.

Kona-ba HSS atu hola nia ba joga iha klube sira Indonézia Boxista ne’e seidauk fó komentariu tanba sei foku ba treinamentu oinsa hatudu rezultadu di’ak iha eventu HSS nian semana oin.

Jornalista: Hortencio Sanchez

Editór        : Florencio Miranda Ximenes

iklan
iklan

Leave a Reply

iklan
error: Content is protected !!