DILI, 08 jullu 2024 (TATOLI)–Diretór Servisu Edukasaun munisípiu Liquiçá, Júlio da Silva, husu ba dirijente eskola hotu iha munisípiu Liquiçá atu halo jestaun nune’e bele realiza ezame segundu períodu.
“Eskola preokupa konsensaun eskolár maibé ita-nia diretór eskola sira presiza halo jestaun hodi oinsá bele realiza ezame segundu períodu ho di’ak no susesu iha tinan ne’e,” Diretór Servisu munisipál hateten ba Agência Tatoli, via telefónika, segunda ne’e.
Iha sorin seluk, eskola pré-eskolár foti ona osan konsensaun eskolár no hatama ona relatóriu, enkuantu ensinu báziku no sekundáriu jerál nian foin mak halo levatamentu.
Nia dehan, konsensaun eskolár ba ensinu báziku hamutuk $204.420 ba fulan-neen.
“Ida-ne’e ba ita-nia estudante hamutuk 17.035 husi eskola 51, ba ensinu pre-eskolár aloka $6.051 ba estudante 201,” nia akresenta.
Notísia relevante : Ministériu Finansa prosesa ona konsensaun eskolár
Konsensaun eskolár ba ensinu sekundáriu jerál no tékniku vokasionál seidauk tanba semana kotuk mak foin asina.
Hatán ba kestaun konsensaun eskolár, Diretór Benjamin Fernandes relata katak hafoin asina karta aprovasaun ne’e, Ministériu Finansa sei fasilita eskola ida-idak hodi loke sira-nia konta bankária nune’e ministériu bele halo tranferénsia orsamentu direta ba konta eskola ida-idak nian.
“Ohin ami bolu Diretór eskola sekundáriu sira neʼebé ohin mai asina ona, nune’e hodi loke konta bankária kada eskola nian. Tanbasá mak sira tenke loke konta bankária, tanba ita-nia orsamentu agora iha transferénsia públika nian, entaun tenke halo transferénsia direita ba kada eskola iha semana dahuluk fulan-jullu ne’e,” nia esplika.
Ministériu Edukasaun aloka orsamentu konsensaun eskolár ne’e atu fasilita eskola sira hodi prodús matéria ezame trimestre daruak ne’ebé sei realiza iha fulan-jullu. Antes ne’e, orsamentu konsensaun eskolár ne’e transfere ba Edukasaun munisipál depois munisípiu aloka ba eskola ida-idak.
“Diretór eskola sira iha alternativu ka meiu saida mak bele solusiona asuntu osan konsensaun eskolár ne’e, maibé ha’u atu dehan to’o agora seidauk kestiona ba ami kona-ba konsensaun eskolár. Ami iha WhatsApp grupu entre Diretór sira,” nia dehan.
Eskola ensinu sekundáriu jerál no tékniku vokasionál maka oras ne’e loke ona konta bankária, enkuantu ensinu bázika no pre-eskolár sira ninia konta bankária loke ona antes ne’e.
Jornalista : Osória Marques
Editora : Julia Chatarina
