DILI, 10 jullu 2024 (TATOLI)—Ministériu Finansa (MF) prosesa ona konsensaun eskolár ba ensinu sekundáriu jerál no tékniku vokasionál.
“Orsamentu konsensaun eskolár ba ensinu sekundáriu jerál no ensinu sekundáriu tékniku vokasionál daudaun ne’e halo ona prosesu no hein de’it halo transferénsia ba eskola. Tanba tinan ida-ne’e orsamentu konsensaun eskolár ne’e liuhusi fali item transferénsia públiku, entaun kada eskola tenke loke lai konta bankária,” Diretór Nasionál Ensinu Sekundáriu Jerál iha Ministériu Edukasaun (ME), Benjamin Fernandes, informa ba Agência Tatoli, iha ninia knaar fatin, Vila Verde, kuarta ne’e.
Notísia relevante : ME asina ona karta aprovasaun ba orsamentu konsensaun eskolár
ME serbisu hamutuk ho Ministériu Finansa (MF) atu loke konta bankária ba eskola sira nune’e parte eskola atribui hotu ona dokumentu mai diresaun ensinu sekundáriu tékniku vokasionál no haruka ona ba MF, nune’e hein de’it bainhira Banku Nasionál Komérsiu Timor-Leste (BNCTL, sigla portugés) bolu asina mak osan tama automátika.
“Prosesu orsamentu inklui CPV mós loos hotu ona no prosesu hotu-hotu iha Ministériu Finansa nian. Ami atribui osan ba trimestre rua nian, ne’ebé kada estudante sei hetan $2 ba fulan-ida nian,” nia akresenta.
Totál ensinu sekundáriu jerál iha territóriu hamutuk 54 inklui ona Filiál, enkuantu ensinu tékniku vokasionál iha 31.
Jornalista : Osória Marques
Editora : Julia Chatarina
