SEFOPE organiza feira karreira no edukasaun iha Bobonaro

BOBONARO, 12 jullu 2024 (TATOLI) – Sekretária Estadu Formasaun Profisionál no Empregu (SEFOPE), sesta ne’e lansa  atividade feira karreira no edukasaun ba estudante finalista sira husi Enisnu Sekundária Jerál no Ensinu Tékniku Vokasionál sira iha munisípiu Bobonaro.

Feira ne’e realiza  ho tema atinje futuru brillante liuhusi asesu ba informasaun karreira, rede profisionál, formasaun vokasionál, edukasaun no programa servisu iha rai-laran no rai-li’ur.

Atividade ne’e realiza atu responde na polítika IX Governu Konstituisionál husi SEFOPE ba implementasaun programa investimentu no diversifikaaaun ekonomíka hanesn programa kriasaun oportunidade serbisu nu’udar objetivu nasionál ida bele hasa’e kualifikasaun forsa traballu hodi responde ba dezenvolvimentu ekonomia iha rai-laran.

Feira ne’e realiza ho objetivu atu tulun estudante sra bele prepara sira nia abilidade ne’ebé di’ak hodi kapasita sira nia-an liu husi sentru formasaun no universidade sira atu nune’e bele asesu ba oportunidade serbisu iha rai-laran no rai-li’ur.

Notísia relevante: SEFOPE lansa programa emprendedorizmu ba traballadór timor-oan 56

“Ita-nia alin joven foinsa’e sira hanesan balu ne’ebé mak sei iha sekundária no pre-sekundária signifika katak ita-boot sira tenke hili dalan ne’ebé mak depois remata estudu, ita-boot bele kontinua,” nia fó hanoin.

Nia fó ezemplu, balu remata ona sekundária hanoin katak inan-aman kbiit lato’o, tenke hanoin atubele tuir formasaun ruma, nune’e bele hetan empregu ruma.

“Atu ha’u bele ajuda alin sira, ajuda fali ha’u-nia inan-aman sira,” Sekretáriu Estadu Formasaun Profisionál no Empregu, Rogério de Araújo Mendonça, hateten iha Jináziu Maliana.

Entretantu, Sekretáriu Estadu Ensinu Sekundária Tékniku Vokasionál, Domingos Lemos Lopes, reforsa eventu ne’e fó oportunidade diskute polítiku kona-ba asesu ba empregu liuhusi nível nasionál no internasionál no atu explora oportunidade formasaun ho edukasaun ne’ebé kontribui hamenus taxa dezempregu.

Nia hatutan, edukasaun nu’udar papél fundamentál iha prosesu ida-ne’e tanba ne’e Ministériu Edukasaun investe ona ba ensinu sekundária tékniku vakasionál hodi fó oportunidade ba finalista sira ne’ebé hetan sertifikasaun.

“Eventu ida-ne’e sai hanesan realizadór ba progresu, kolaborasaun ba atinje ita-nia objetivu komún sira, hamutuk ita bele fó oportunidade ba ita-nia joven sira, atu nune’e sira bele harii futuru ida-ne’ebé di’ak, nabilan ba ita-nia nasaun,” nia tenik.

Sekretáriu Autoridade Munisípiu Bobonaro ba Asuntu Sosiál, Júlio Carvalho Caero, agradese ba governu no konsidera liuhosi programa ne’ebé SEFOPE realiza bele tulun estudante finalista sira hili dalan ba futuru ne’ebé di’ak no loos.

“Ha’u husu ba estudante sira aproveita oportunidade ne’e no rona didi’ak, hodi foti desizaun ha’u atu ba ne’ebé, labele haree tuir kolega, labele haree tuir domin. Ita espera liuhusi feira ida-ne’e Bobonaro sei hetan rekursu umanu ida ke di’ak, forte hodi prepara ba polítika asembleia munisipál tuir programa nasionál sei halo iha 2025 ka 2026, ita hotu fó liman ba malu hodi hetan susesu,” nia akresenta.

Enkuantu feira ne’ebé hala’o durante loron rua ne’e partisipa husi estudante hamutuk 667 mai husi Sekundáriu Jerál no Tékniku Vokasionál sira ne’ebé eziste iha munisípiu Bobonaro.

Notísia relevante: Grupu hitu sai ona benefisiáriu ba programa auto-empregu husi SEFOPE

Jornalista: Sérgio da Cruz
Editór: Evaristo Soares Martins