iklan

HEADLINE, OEKUSI

BRI selebra kontratu arrendamentu ho RAEOA hodi alarga nia sukursál

BRI selebra kontratu arrendamentu ho RAEOA hodi alarga nia sukursál

Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago de Fátima Lobato, segunda ne’e, selebra kontratu arrendamentu rai ho General Manager Banku Repúblika Indonézia (BRI) iha Timor-Leste, Fajar Galih Permana, atu loke sukursál BRI iha Oé-Cusse Ambeno. Imajen Tatoli/Abílio Elo Nini

OÉ-CUSSE, 15 jullu 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, selebra kontratu arrendamentu rai ho Jerente Jerál Bank Rakyat Indonesia (BRI) iha Timor-Leste, Fajar Galih Permana, atu loke nia sukursál iha Oé-Cusse.

“Ida-ne’e dezenvolvimentu ida kapa’as, tanba sira mai loke banku iha ne’e bele apoia ekonomia Oé-Cusse, liuhusi instrumentu finanseiru kréditu bankáriu. Sira bele fó empresta osan ba ema sira-ne’ebé persiza atu halo fila-liman bele hetan kapitál atu hadi’a moris”, Rogério Lobato hateten.

Notísia relevante: Embaixadór Indonézia koordena Autoridade atu loke BRI iha Oé-Cusse

Nia informa katak kontratu arrendamentu ba rai Estadu ho durasaun tinan 30, kada fulan BRI sei selu arrendamaentu $600 ba kofre Estadu no fatin ne’e lokaliza iha Santa Rosa, área tasi-ibun, iha edifisíu KBRI nia sorin.

“Sira mak sei investe iha uma rasik no sede BRI, nune’e bele serbisu ho konfortavel, tanba ema mai tau sira-nia osan iha ne’e, ita tenke fó mós arrendamentu ne’e ho tempu naruk uitoan. Sira bele investe sira-nia osan ho tempu sufisiente atu rekupera fali osan ne’ebé investe ona iha Oé-Cusse”, nia dehan.

Jerente Jerál BRI iha Timor-Leste, Fajar Galih Permana, agradese ba autoridade RAEOA, tanba bele oferese ona fatin atu loke banku iha Oé-Cusse.

“Ami sei koordena didi’ak ho sentrál iha Díli, nune’e bele harii ona edifisíu sukursál ida iha Oé-Cusse atu hahú halo atendimentu ba kliente ne’ebé hakarak asesu ba iha banku. Ba fatin, ohin ita asina ona kontratu, entaun persiza halo ona serbisu”, salienta.

Notísia relevante: KBRI koordena Autoridade RAEOA, hakarak realiza feira edukasaun iha Oé-Cusse

Jornalista: Abílio Elo Nini

Editora: Maria Auxiliadora

iklan
iklan

Leave a Reply

iklan
error: Content is protected !!