ASEAN Championship U-19, Timor-Leste dere Kamboja 3-2
DILI, 17 jullu 2024 (TATOLI) – Ekipa Timor-Leste ho naran istimadu Lafaek ne’ebé lidera husi treinadór timoroan, Eduardo Pereira, konsege konkista vitória dala uluk iha ASEAN Championship 2024 ne’ebé realiza iha Surabaya-Indonézia hodi manán adversáriu Kamboja ho rezultadu 3-2.
Jogu ba ekipa rua hala’o iha Estádiu Stadion Gelora Bung Tomo Surabaya, kuarta ne’e, tuku 17:00 lokraik otl. Iha jogu ne’e ekipa Timor-Leste hatudu jogu ne’ebé brillante hodi hamonu Kamboja ho golu ne’ebé mihis, maibé manán.
Golu vitória husi Timor-Leste nia prodús husi jogadó Vabio Canabaro iha minutu ’33, Alexandro Bahkito ’36 no Luis Figo ’38. Enkuantu golu Kamboja nian prodús husi jogadór Sorm Sorith ’55, Chheang Kimsong ’60.
Husi vitória ne’e lori ekipa Timor-Leste hadau daudaun ona pontu tolu iha grupu A ne’ebé kompostu husi Indonézia, Kamboja, Filipina.
Tuir oráriu ne’ebé iha Timor-Leste sei luta hasoru Filipina iha 20 jullu 2024, iha ne’ebé jogu sei realiza iha Stadion Gelora Bung Tomo Surabaya tuku 16:00 loraik otl.
Entertantu iha jogu ikus faze grupu sei kontra uma-na’in Indonézia iha 23 jullu 2024 iha Stadion Gelora Bung Tomo Surabaya tuku 20:30 kalan otl.
Iha jogu segundu kontra Filipina hanesan jogu ne’ebé importante ba Timor-Leste hodi deside distinu haka’at ba semi-finál nian.
Jornalista: Hortencio Sanchez
Editór: Florencio Miranda Ximenes
