DILI, 17 jullu 2024 (TATOLI) – Tribunál Judisiál Primeira Instánsia Dili (TJPID) iha kuarta (17/7), ohin, kontinua halo julgamentu ba kazu arma proibida ne’ebé envolve husi arguidu Longuinhos Monteiro.
Iha ajenda julgamentu ne’e, Tribunál husu ba Ministériu Públiku atu aprezenta nia alegasaun ba kazu ne’e, iha alegasaun Prokuradór Domingos Goveia husu ba Tribunál atu aplika pena prizaun tinan ida ho fulan-neen no suspende ba tinan ida fulan-neen ba arguidu Longuinhos Monteiro tanba arguidu konfesa parsialmente katak rai duni arma ho item 24 iha nia rezidénsia.
Tuir prokuradór katak hahú husi inísiu julgamentu ba kazu arma proibida, arguidu koopera tebes ho parte justisa hodi fó ninia depoimentu sira kona-ba kazu ne’e.
“Iha prosesu ida-ne’e, arguidu koopera tebes ho parte justisa hodi fó ninia depoimentu sira iha prosesu julgamentu sira ba kazu ida-ne’e no arguidu mós deklara ho parsialmente katak arguidu rekoñese rai duni arma proibida sira ne’e iha nia rezidénsia, tanba ne’e, Ministériu Públiku husu ba Tribunál koletiva atu aplika pena prizaun efetiva tinan ida ho fulan-neen no suspende ba tinan ida ho fulan-neen’’, Prokuradór Domingos Goveia deklara iha sala julgamentu.
Nia dehan, iha prosesu julgamentu, arguidu mós kestiona kona-ba autoridade sira ba halo buska ba nia rezidénsia iha Liquiça no Fomentu tanba iha juriprudénsia balun iha prosesu ne’e no Ministériu Públiku mós simu preokupasaun ida-ne’e.
“Arguidu mós rekoñese katak iha buska no apreensaun ne’ebé momentu autoridade sira halo ba nia rezidénsia ne’e por imujénsia ka ho motivu, mibé depois kazu ne’e halo tiha julgamentu, Ministériu Públiku entende katak buska no apreensaun ne’ebé autoridade halo ba arguidu nia uma iha Fomentu ne’e ho baze legál tanba ho mandadu judisiáriu husi Tribunál”, nia haktuir.
Prokuradór Domingos adianta, julgamentu ba kazu ida-ne’e, sasin ne’ebé Tribunál arrola deklara katak arma ne’ebé arguidu rai iha nia rezidénsia ne’e laos arma de fogo.
“Fatu sira ne’ebé ita apura iha kazu ida-ne’e, husi sasin sira no péritu sira konfesa ba Tribunál katak arma sira ne’ebé arguidu rai iha nia rezidénsia bazeia ba akuzasaun Ministériu Públiku, arma sira ne’e laos arma de fogo, maibé tuir Ministériu Públiku nia entendimentu katak arma sira ne’e tuir lei só ba ema polísia no forsa mak bele kaer, sivil labele ka’er arma. Tanba ne’e Ministériu Públiku aseita no husu ba Tribunál atu fó pena prizaun tinan ida fulan-neen no suspende ba tinan ida fulan-neen ba arguidu”, nia afirma.
Iha alegasaun, Ministériu Públiku, prokuradór husu ba Tribunál atu entrega fila fali sasan sira hanesan Air Shotgun no rompi ba fali arguidu tanba sasan sira ne’e la fó perigu ba ema nia vida.
“Husu ba Tribunál atu entrega fali sasan sira hansan Air Shotgun no rompi ba fali arguidu tanba tanba sasan sira ne’e la fó perigu ba ema nia vida. Enkuantu munisaun no arma sira seluk husu Tribunál atu entrega ba Estadu”, nia dehan.
Iha fatin hanesan, hatan ba alegasaun Ministériu Públiku nian, Defeza ba arguidu Longuinhos Monteiro, Advogado Privadu, João Pavão husu ba Tribunál atu absolve arguidu husi krime ba posa arma proibida ne’ebé Ministériu Públiku imputa ba nia. Tanba iha julgamentu, sasin sira deklara katak arma sira ne’ebé mak iha akuzasaun Ministériu Públiku nian ne’e laos arma de fogo.
“Arma sira ne’e laos arma ne’ebé fó perigu ba ema nia vida tanba ne’e husi Tribunál tenke tenta tuir Tribunál nia konviksaun atu absolve arguidu husi krime ne’ebé Ministériu Públiku imputa ba arguidu tuir lei regulamentu UNTAET nian”, nia konklui.
Hafoin Tribunál rona tiha parte hotu, Juiz koletivu Juiz Maria Solana Fernandes, Afonso Carmona no Albertina Neves marka fali ba loron 30 jullu 2024 tuku 16:30 hodi rona desizaun.
Notísia relevante : Arguidu Longuinhos rekoñese rai arma item 24 iha nia rezidénsia
Sasin iha Tribunál dehan Longuinhos la rai ‘’arma de fogo’’
Jornalista: Natalino Costa
Editór : Zezito Silva
