DILI, 19 jullu 2024 (TATOLI)—Diretór Prinsipál Telemor, Brian Tran Van Bang, ho nia ekipa hasoru malu ho Prezidente Repúblika, Jose Ramos Horta hodi hato’o Telemor nia pozisaun no promesa atu aumenta kapasidade internet, durante vizita Amu Papa Francisco mai Timor Leste, iha Setembru 2024 ne’e.
“Ami hasoru malu ho Prezidente Repúblika, hodi entrega relatóriu kona-ba Telemor durante fulan neen iha tinan 2024, no diskute mós kona-ba atualizasaun kapasidade internet iha preparasaun ba vizita Papa Francisco nian, no internet ne’ebé sei fasilita husi Telemor, no-mós diskute ona preparasaun ba vizita Prezidente nian ba Vietname,” Diretór Prinsipál Telemor katak ba jornalista sira hafoin enkontru iha Palásiu Prezidensiál Dili, ohin.
Diretór ne’e dehan, atu fasilita kapasidade internet durante Amu Papa nia vizita, Telemor halo hela kolaborasaun ho Autoriade Nasionál Komunikasaun (ANC-sigla portugés), no-mos internet ne’e fasilita husi Telemor liuhusi 100% ne’ebé sei aumenta kapasidade internet iha loron Amu Papa Francisco to’o Timor Leste.
“Telemor mós sei hadi’a kualidade internet ho Fibra Ótika ne’ebé to’o ona, no hadi’a mós kualidade internet ne’ebé oras ne’e sai problema hodi hasa’e liután benefísiariu sira,” nia dehan.
Husi Juñu to’o Agostu, aumenta nia benefísiu internet atu nune’e bele hasa’e kualidade internet Telemor nian atu nune’e bele fasilita konsumidór sira uza internet.
Durante enkontru, Xefe Estadu kontente tebes ho fasilidade sira ne’ebé Telemor iha, no husu ba Telemor atu kontinua fornese kualidade internet ne’ebé adekuadu, liuliu iha loron vizita Papa Francisco nian no Prezidente fiar katak Telemor bele hadi’a no fó benefísiu di’ak.
Jornalista: Hortencio Sanchez
Editór: Florencio Miranda Ximenes
