SEPS: Estrutura foun APC presiza hakruuk ba desizaun ierarkia
DILI, 22 Jullu 2024 (TATOLI) – Sekretáriu Estadu Protesaun Sivíl (SEPS), Domingos Mariano Reis, husu ba estrutura foun Autoridade Protesaun Sivíl (APC, sigla portugés) husi nasionál to’o munisípiu atu serbisu ho responsabilidade no hakruuk ba desizaun ierarkia.
“Hahú husi ida ne’ebé dasa fo’er ba to’o ida ne’ebé aas liu tenke sai hanesan hare bainhira isin nakonu nia sempre hakruuk. Tanba ne’e, ba kuadru foun sira tenke hakruuk ba ema hotu, respeita ierarkia, inklui respeita prezidente autoridade nu’udar superiór”, Domingos Reis hateten iha ámbitu serimónia entrega serbisu husi estrutura tuan ba estrutura foun APC, iha Caicoli, ohin.
Governante ne’e solisita ba Prezidente foun APC, Jesuíno dos Reis Matos Carvalho, no kuadru sira hotu hala’o knaar hodi garante serbisu protesaun sivíl iha tinan haat ne’e ho misaun ida klara hodi serbí no proteje povu. Tanba ne’e, estrutura foun tenke iha dixiplina, iha lealdade, onestidade no serbisu ho ekipa, tanba knaar protesaun sivíl ne’e 75% sempre hasoru dezafiu barak.
“Ha’u sei la fó espasu ba pesoál ida iha APC ne’e atu hakat liu diretór-ezekutivu, komandante operasaun no prezidente APC. Tanba ne’e, ha’u husu ba hotu-hotu atu tau asuntu ida ne’e ho didi’ak, nune’e bele kria situasaun ida hakmatek iha APC nia laran hodi ema hotu bele serbisu ho boa vontade”, nia afirma.
Iha okaziaun entrega serbisu, sekretáriu Estadu ne’e agradese mós ba Prezidente sesante Autoridade Protesaun Sivíl, Ismael Babo, ba kontribuisaun ne’ebé halo ona iha SEPS hodi lori susesu ba APC ne’e rasik.
Tuir nia, Ismael Babo nu’udar fundadór ba APC no liuhusi nia kontribuisaun lori ona progresu ba serbisu protesaun sivíl nian. Nia husu ba eis-prezidente ne’e atu kontinua koopera, nune’e bele ajuda estrutura foun sira bele serbisu ho di’ak liután.
“Nasaun no povu Timór presiza tebes kontribuisaun ema hotu nian iha serbisu ida ne’e, ho koñesimentu kle’an, povu kontinua hein ita-boot nia kontribuisaun atu hamutuk lori susesu ba APC ne’e”, nia sujere.
Iha sorin seluk, Prezidente foun APC, Jesuíno dos Reis Matos Carvalho, apresia serbisu eis-prezidente Ismael Babo ne’ebé hatudu nia lealdade no tau-matan ba APC hodi lori susesu ba serbisu sira iha terrenu.
“Iha fali estrutura foun ne’ebé mai atu kontinua fali serbisu ida ne’e. Iha mandatu estrutura foun ne’e sei halo esforsu atu serbisu ho lealdade no transparénsia atu responde ba problema sira ne’ebé komunidade hasoru iha terrenu”, nia promete.
Iha serimónia ne’e entrega mós medalla agradesimentu ba Prezidente sesante APC no Komandante Polísia Operasionál iha munisípiu sira, inklui Oé-Cusse ba dedikasaun ne’ebé sira fó ona durante serbisu hamutuk ho SEPS.
Notísia relasionada: Kalbuadi Lay enkoraja estrutura foun APC atu serbisu ho responsabilidade
Jornalista: Tomé Amado
Editora: Maria Auxiliadora
