Zélia Marçal konkista segundu lugar ba konkursu “Escrita Criativa CPLP” iha Portugal
DILI, 22 jullu 2024 (TATOLI)- Timor-oan ho naran Zélia Marçal, konkista segunda lugar iha konkursu “Escrita Criativa” ho tema “Futuro Sustentabilidade CPLP” ne’ebé organiza husi sekretariadu Komunidade Ko’alia Lian Portugés (CPLP-sigla portugés) iha Lisboa-Portugál.
Zélia Marçal nu’udar estudante klase sanolu ka 10.° ano, iha eskola CAFÉ-Dili, ho idade tinan 16, husi Munisípiu Ermera.
Kompetisaun konkursu “Escrita Criativa” ne’e, hanesan projetu pilotu ida-ne’ebé organiza husi Sekretariadu CPLP nian iha Lisboa-Portugál ba eskola hamutuk 130 iha nível nasionál husi nasaun membru CPLP sia.
Durante iha konkursu, iha estudante na’in-24, mak selesionadu hodi kontinua ba partisipa iha konkursu internasionál, iha ne’ebé rezultadu finál hatudu, primeiru lugar husi estudante ida husi nasaun Cabo-Verde, segunda lugar, Zélia Marçal husi Timor-Leste no terseiru lugar husi Portugál.
Prémiu ne’ebé nia simu maka osan hamutuk €900 EUR no mós sertifikadu ne’ebé entrega direta husi Sekretáriu Ezekutivu CPLP, Zacarias Albano da Costa, iha ámbitu reuniaun ordinária Konsellu Ministru CPLP ba-dala XXIX ne’ebé hala’o iha São Tomé e Príncipe, foin lalais ne’e.
Biban ne’e, Estudante Zélia Marçal sente kontente tebes, tanba reprezenta nasaun Timor-Leste, partisipa iha konkursu internasionál ne’e no sai segundu lugar.
“Sente orgullu tebes, tanba ha’u bele reprezenta ita-nia nasaun Timor-Leste, hatudu katak, ita Timor mós bele. Konkursu naran “Escrita Criativa” ho tema “Futuro Sustentabilidade CPLP”, membru CPLP nasaun sia, maibé tenke iha rede eskola amiga CPLP mak bele tuir. Kada nasaun ida iha rede eskola amigu CPLP,” Zélia Marçal hateten liuhusi nota ne’ebé Agência TATOLI asesu husi media MNEK, ohin.
Estudante 10.° ano iha CAFÉ Dili, tinan 16 husi Munisípiu Ermera ne’e promete, ho esperiénsia ne’ebé hetan liuhusi konkursu refere, ba futuru sei dezenvolve di’ak liután, atu bele sai nu’udar eskritora ne’ebé di’ak ba Timor-Leste.
Zélia hatutan, partisipa iha kompetisaun refere la’ós husi eskola CAFÉ de Dili de’it, maibé, iha mós eskola seluk hanesan Eskola Sekundária 4 de Setembru UNAMET Balidé.
Tanba ne’e, estudante Zélia Marçal husu ba maluk estudante sira seluk, atu esforsu aan nafatin aprende atu bele hetan mós oportunidade hodi partisipa iha kompetisaun internasionál sira.
Governu Kongratula Zélia
Ministru Negósiu Estranjeiru no Kooperasaun (MNEK), Bendito dos Santos Freitas , orgullu ho estudante timoroan husi eskola CAFÉ de Dili, Zélia Marçal, ne’ebé hetan segundu lugar iha kompetisaun hakerek, no ida-ne’e orgullu mós ba Timor-Leste.
“Bainhira nia fila, tenke hatene nia inan-aman, nia eskola iha ne’ebé, joven ne’ebé iha talentu, iha kriatividade, iha intelijénsia, ita bele fó apoiu nafatin para bele dezenvolve nia matenek, inrikese nia esperiénsia liuliu ba parte akadémika ne’e nia bele sai futuru ida di’ak ba ita-nia rain,” Ministru Bendito hateten.
Nune’e mós, Sekretáriu Ezekutivu CPLP, Zacarias Albano da Costa hateten, konkursu “Escrita Criativa” ne’e inisiativa husi Sekretariadu CPLP iha tinan ida-ne’e.
“Tinan ida-ne’e ami organiza duni konkursu de eskrita kriativa partisipa iha projetu pilotu ida-ne’e hamutuk eskola 130, ne’e nível nasionál iha kada Estadu-membru, depois alunus 24 mak hetan selesaun atu partisipa fali iha konkursu internasionál ida-ne’ebé faze final mak na’in-tolu, primeiru lugar husi Cabo Verde, Segundu husi Timor-Leste, Zélia Marçal no Terseiru lugar ba Portugal,” katak Zacarias Albano.
Eis Ministru Negósiu Estranjeiru Timor-Leste ne’e hatutan, kompetisaun konkursu “Escrita Criativa” ne’e importante tebes, tanba, aleinde manán prémiu no sertifikadu, sira mós sai hanesan embaixadór ba CPLP hodi hato’o ba maluk joven sira seluk katak, futuru CPLP iha juventude sira.
“Joven sira ohin tenke konsiénte katak, komunidade ida-ne’e iha benefísiu bara-barak ba ita, tanba problema bara-barak ita hotu-hotu enfrenta, mais so fó liman ba malu, kooperasaun, interkámbiu ne’e mak ita hotu bele rezolve dezafiu no problema sira ne’ebé mosu iha ita ida-idak nian-rain,” Sekretáriu Ezekutivu ne’e konklui.
Notisia relevante:Zacarias Albano atualiza servisu Sekretáriu Ezekutivu CPLP ba Xefe Estadu
Jornalista: Hortencio Sanchez
Editór: Florencio Miranda Ximenes
