DILI, 23 jullu 2024 (TATOLI)—Sekretaria Estadu Kooperativa (SEKoop), tersa ne’e, asina nota entedimentu ho Blue Venture hodi fasilita formasaun ba grupu hitu, ba durasaun tempu tinan-haat.
Sekretáriu Estadu Kooperativa, Arsénio Pereira da Silva, hateten, nota entendimentu ne’ebé parte rua ohin asina ho objetivu bele serbisu hamutuk atu fasilita formasaun no estudu komparativu ba grupu sira ne’ebé eziste no forma husi Blue Venture atu transforma ba kooperativa.
“Ita hatene katak ezisténsia kooperativa ne’e importante tebes, tanba ne’e grupu sira ne’ebé esforsu hakarak sai kooperativa tenke fasilita formasaun lae dalabarak grupu balu hetan tiha osan husi parseiru sira, bainhira parseiru sira la apoiu grupu mós mate, maibé ita fasilita fó formasaun prepara sira sai kooperativa hodi kontribui ba rai ne’e,” Arsénio Pereira da Silva, informa iha salaun SEKoop, Akait.
Notísia relevante : SEKoop no ADRA selebra akordu kapasita grupu kooperativa
Ekipa SEKoop fasilita formasaun iha área jestaun, bázika kooperativa, produsaun no seluk tan no akompaña grupu kooperativa sira
Iha fatin hanesan, Diretóra Ezekutiva Blue Ventures Timor-Leste, Bernardete da Fonseca, hateten, objetivu asina akordu ne’e atu serbisu hamutuk hodi fó formasaun ba grupu ne’ebé sira harii ona, liu-liu iha área kosteira ba grupu peskadór ka metidór sira hodi halo serbisu hanesan rai no empresta osan.
Grupu sira ne’e, Dili Atáuro, Hera, Manatuto, no aumenta tan ba Manufahi.
“Entaun, objetivu serbisu hamutuk hodi ami-nia grupu mós hetan formasaun hodi hetan legalidade husi Governu, nune’e iha futuru bele hetan apoiu husi Governu,” nia tenik.
Atividade ne’ebé durante ne’e Blue Venture halo mak hanesan iha serbisu estratejia nian hamutuk ho peskadór ka meti na’in sira halo jestaun peska no konservasaun. Agora serbisu foka liubá iha oinsá suporta komunidade iha jestaun peska nune’e sira jere sira-nia rekursu tasi nian liuhuis tara-bandu, kapasitasaun utiliza telemóvel foti dadus atu hatene ikan hira mak iha tasi-laran molok halo protesaun liuhusi tara-bandu ne’e.
“Ami-nia serbisu ne’e área peska no ambiente, entaun serbisu ne’ebé ami halo aliende halo kooperasaun ho SEKoop ami mós serbisu hamutuk ho Ministériu Turizmu no Ambiente no Ministériu Agrikultura Peska Pekuária no Floresta inklui serbisu hamutuk ba organizasaun Sisiedade Sivíl sira ne’ebé serbisu ba konservasaun ninian no seluk tan,” nia dehan.
Grupu ezistente rua halo ona operasaun hitu, grupu metidór sira impesta no rai osan foku ba peskadór. Grupu metidór ka peskadór ne’ebé daudaun rai no empresta osan atu hetan formasaun husi SEKoop ne’e hamutuk hitu ho totál membru hamutuk 3.000-resin.
Jornalista : Arminda Fonseca
Editora : Julia Chatarina
