Konklui iha tinan ne’e dezeñu ba Portu Naval Hera

DILI, 25 jullu 2024 (TATOLI) – Ministru Defeza, Kontra Almirante Donanciano Costa Gomes Pedro Klamar Fuik, dehan Ministériu Defeza konkui ona, iha tinan ne’e, dezeñu ba Portu Naval, hafoin konstrui iha 2025.

“Konstitui ba Governu Konstitusionál nian prioridade haree uluk mak infrastrutura, 2024 konklui dezeñu ba Portu Komponente Navál no agora daudaun husi parte enjineiru Komandu F -FDTL hamutuk ho Komandu Tékniku Komponente Naval aprezenta ona proposta dezenu ida Portu Naval ba Konsellu Administrasaun Fundu Infraestrutura no oras ne’e daudaun iha ona diskusaun, los duni, iha tinan ida-ne’e, ita konklui dezeñu ba Portu Navál, tinan oin ita komesa implementa konstrusaun”, Klamar Fuik hateten ba jornalista sira hafoin vizita ba forsa Komponente Navál Hera, kinta, ohin.

Nia afirma, Governu deside ona katak Portu Naval Hera sei konstrui iha tinan oin hafoin hola ró naval, tuir kondisaun finanseira Governu nian.

“Ita dezenvolve ita-nia kapasidade bazeia ba ita-nia kondisaun mós, idealmente ita bele hola ró rua, ne’e mínimu, maibé depende ba ita-nia kondisaun finaseira, maibé kuandu ita iha kondisaun ona mak ita bele hola tán, ba forsa armada, ita bele halo planu atu bele liu ita-nia kapasidade Estadu”, nia afirma.

Klamar Fuik mós revela katak hakarak dezenvolve forsa komponente naval ne’ebé mak moderna no forsa ne’ebé efetivu.

“Tuir indikadór sira ba dezenvolvimentu forsa komponente navál nian sei liu mil ba fuzileiru naval, sei aumenta tán to’o iha batallan ida, portantu, ida ne’e mak ita-nia planu, maibé ba dezenvolvimentu hirak ne’e ita mós tenke haree tuir sistematikamente tuir ita-nia kapasidade finaseira”, nia haktuir.

Nia dehan, Ministru Defeza nia prioridade ba tinan ida-ne’e mak infraestrututa Portu Navál no infraestrruta militár sira seluk.

Jornalista: Natalino Costa

Editór : Zezito Silva