DILI, 30 jullu 2024 (TATOLI)–Dirijente eskola ensinu sekundáriu inklui ensinu báziku sira iha munisípiu orienta estudante hasai fotografia ho medida 3×4 ba preparasaun ezame nasionál.
“Diretór sira haruka ami tenke mai iha rental Timor Di’ak iha Dili ne’e mak hasai fotografia ba ezame nasionál, tanba dehan hasai foto iha rental balun ne’e dehan tau kleur ne’e sai a’at hotu ka la moos,” Estudante husi Ensinu Sekundáriu Jerál Vemasse Baucau, Sandra Gusmão, hateten iha Akait, tersa ne’e.
Maski halo viajen dook, maibé nu’udár estudante la’o tuir orientasaun eskola tanba fotografia ne’e atu uza taka iha diploma.
Nune’e mós, estudante husi Eskola Ensinu Sekundáriu Jerál Fernando ‘Lasama’ de Araújo iha Ainaro, Natercia Lopes, hateten, husi eskola orienta estudante sira hasai fotografia iha Dili.
“Sira dehan iha Timor Di’ak ne’e mak kualidade di’ak, entaun ami-nia diretór sira haruka ami tenke mai hasai fotografia iha ne’e. Fotografia ne’e ami atu prepara ba ezame nasionál. Maski dook mós ami mai de’it tanba ne’e diretór mak haruka,” nia akresenta.
Notísia relevante : Posibilidade ME koloka kandidatu admitidu faze daruak ba ESTV hodi prepara ezame nasionál
Nune’e mós, estudante husi munisípiu Ermera, Rita de Deus Babo, dehan, sira tenke mai hasai fotografia iha rentál Timor Di’ak tanba kualidade liu.
“Ami mai hasai fotografia iha ne’e tanba diretór eskola mak haruka, ami tuir de’it diretór sira mai fotografia iha ne’e tanba iha ne’e mak dehan kualidade di’ak,” nia tenik.
ME rejeita orienta hasai fotografia iha Dili
Diretór Nasionál Ensinu Sekundáriu Jerál iha Ministériu Edukasaun (ME), Benjamin Fernandes, hateten, ME seidauk fó orientasaun ba dirijente eskola sira hodi haruka estudante terseiru anu sira tenke mai hasai foto iha fatin ruma iha Dili.
“Diresaun Nasionál Ensinu Sekundáriu Jerál seidauk fó orientasaun ida ba ema atu hasai fotografia tenke mai iha Dili no seidauk iha informasaun ba ida-ne’e. Diresaun mós ko’alia ho munisípiu maibé sira mós la hatene informasaun kona-ba ida-ne’e, tanba ita hatene katak oras ne’e daudaun rental hasai fotografia ne’e eziste hotu iha munisípiu, ne’ebé la presiza tun mai Dili. Tanba ne’e mak Diresaun Nasionál nafatin iha nia pozisaun, seidauk fó autorizasaun ba ema atu mai hasai foto iha Dili,” nia dehan.
Diretór konsidera, karik hanesan inisiativa privadu ruma ne’ebé mak hakarak halo situasaun sai hanesan ne’e.
“Normalmente kada tinan ne’e hasai fotografia iha eskola de’it no bolu ema ba hasai de’it iha ne’ebá nomós iha rental seluk, ita nunka orienta estudante tenke tun Dili mak hasai fotografia, ne’e foin primeira vez,” nia informa.
Nune’e, nia husu ba dirjente eskola nível ensinu sekundáriu jerál katak atu halo buat ruma tenke konfirma uluk ho parte Diresaun Nasionál tanba dirijente sira tenke tetu hotu kondisaun sira ne’e, satán husi munisípiu mak mai Dili ne’e iha risku boot.
“Tanba de’it fotografia ne’e mak buat ruma oinsá, ne’ebé diresaun la autoriza no sei buka tuir se mak halo buat sira ne’e,” nia katak.
Hasai fotografia iha rental Timor Di’ak Dili, bainhira foti kedan selu $6 maibé bainhira hein to’o loron seluk mak mai foti ne’e selu $2,50.
Ligadu ho asuntu ne’e, jornalista tenta konfirma ho na’in ba empreza Timor Di’ak iha Akait maibé laiha fatin, bainhira traballadór sira komunika via telefónika, konfirma katak durante ne’e parte empreza laiha kontratu ruma ho eskola sira iha munisípiu hodi haruka estudante sira mai hasai fotografia iha Dili.
Tuir informasaun katak iha tinan-rua ba kotuk empreza Timor Di’ak iha duni akordu ho eskola sekundária jerál no tékniku vokasionál husi munisípiu, nune’e bainhira tama ba ezame nasionál, parte eskola orianta estudante sira hasai fotografia iha Timor Di’ak.
Jornalista : Osória Marques
Editora : Julia Chatarina
