BOBONARO, 09 agostu 2024 (TATOLI) – Prezidente Autoridade Munisipál Bobonaro (PAM), Alexandrino Pires, hamutuk ho diretór servisu munisipál sira, kinta ne’e halo vizita ba suku tolu hanesan; Daudu, Meligo no Genulai, postu administrativu Cailaco hodi halo monitorizasaun ba projetu Programa Nasionál Dezenvolvimentu Suku no haree direita problema no preokupasaun ne’ebé komunidade enfrenta.
Monitorizasaun ba projetu PNDS ne’ebé loke dalan foun husi suku Daudu, Genulai liga ba Poerema, aldeia Liabote, suku Meligo no aldeia Mude.
Alende ne’e atu haree no rona direita problema no preokupasaun ne’ebé durante ne’e komunidade-sira enfrenta hanesan estrada, eletrisidade, bee-moos no saúde.
Autoridade munisipál liuhosi programa PNDS tau orsamentu ba loke estrada foun ne’e atu fasilita komunidade sira lori produtu lokál asesu ba merkadu inklui nesesidade seluk iha postu administrativu Cailaco no kapitál Maliana.
Tuir nia, desde ukun-aan komunidade liuliu iha área rural halerik tebes ba kondisaun estrada.
Notísia relevante: Xefe suku Atudara husu IGE kotinua mellora dalan Poerema ba Cailaco
“Ita-nia estrada kuandu laiha katuas ho ferik moras ambulánsia labele mai, sira hein mate deit, ida ne’e mak estrada ne’e importante ba ita, ita-nia estrada ne’e di’ak parte agrikultura nian saida mak imi atu halo, halo de’it,” nia katak.
Nia hatutan, iha tinan oin 2025 liuhosi projetu PNDS munisípiu Bobonaro sei hetan orsamentu millaun $2,400 hodi halo dezenvolvimentu iha suku no aldeia-sira hodi responde povu nia preokupasaun liu kona-bá estrada no infraestutura bázika seluk tán.
“Ha’u aprova tiha ona, hein ba debate iha parlamentu, ha’u promete ba imi, ha’u sei defende osan ida, to’o sira hasai husi Prezidente Autoridade, tanba osan ne’e la’ós ba ha’u nian, tanba tinan 20 ita ukun-an inan-aman sira terus, sofre la halimar,” nia afirma.
Kona-bá problema bee-mos, Alexandre konfirma iha fulan rua liubá Autoridade Munisipál Bobonaro asina ona akordu ho parseiru ida husi Amérika atu halo instalasaun bee-moos ba komunidade sira ho orsamentu millaun $4.
“Iha tempu badak sei implementa, ha’u deside bee-moos sei tama iha ne’e, bainhira tama ona liurai sira hatudu loloos bee-matan, nune’e ita dada be, labele ba dada fali bee ne’ebé tempu bailoro maran fali, entaun osan ne’e ita gasta hotu, ikus mai ita susar nafatin,” nia hateten.
Xefe suku Meligo, Duarte Perreira, agradese ba Prezidente Autoridade Munisípiu Bobonaro ne’ebé iha inisiativa di’ak halo vizita, rona no haree direita kondisaun moris komunidade nian.
Nia hatutan, komunidade sira sente kontenti tanba liuhosi projetu PNDS siklu-neen loke ona estrada foun husi aldeia Mude ba Liabote ne’ebé daudaun ne’e ninia progresu fíziku atinje 55%.
“Ami-nia estrada ne’e hela rona de’it atu borus ba iha Poerema, ida ne’e ami kontente tanba Indonézia ukun ita tinan 20-resin, mai to’o Timor ukun-an tinan 20-resin, foin mak realiza ida-ne’e, ami asesu estrada foun,” nia katak.
Juventude suku Meligo, Octaviano Marsal Soares, rekomenda ba Ministériu Obra Públika atu konsidera estrada ne’e iha projetu estrada rurál.
“Ita lakon ona osan ba ida-ne’e, sé ita laiha kontinuasaun ba manutensaun ba oin hanesan de’it, ita lakon osan saugati de’it, udan mai nia aat fila-fali, ne’e presiza haree ida-ne’e tanba estrada ne’e hanesan fonte ba dezenvolvoimentu,” nia hateten.
Enkuantu projetu projetu loke estrada ne’e iha suku Dau-udu gasta orsamentu rihun $30-resin, Genulai $37 no parte suku Meligo $30-resin.
Enkuantu tuir observasaun jornalista Ajénsia TATOLI iha terrenu nota katak daudaun ne’e transporte karreta no motorizada hahú asesu ba mai husi aldeia ba suku, postu no kapitál Maliana.
Notísia relevante: PMOPA faze ikus iha Cailaco prioriza melloramentu estrada
Jornalista: Sérgio da Cruz
Editór: Evaristo Soares Martins
