DILI, 12 agostu 2024 (TATOLI)-Ema ho Defisiénsia husi Timor-Leste no Indonézia, hala’o enkontru ho Prezidente Repúblika, José Ramos Horta, hodi hato’o programa Abilitasaun Baze ba Komunidade ema ho defisiente.
“Ami husi Organizasaun Raes Hadomi Timor Oan (RHTO), ne’ebé hanesan Organizasaun Nasionál ba Ema Defisiente sira, hamutuk ho ami nia maluk sira hosi Organizasaun Defisiente Indonézia ne’ebé kompostu husi Sumba, Sulawesi Súl, Makasar, Labuan Bajo, Flores, Mangarai. ami nia objetivu iha enkontru ho Prezidente atu hato’o objetivu husi programa ne’ebé mak hala’o hela hamutuk ho ami nia maluk sira husi Indonézia,” Diretór Ezekutivu RHTO, João Cinto dos Santor hateten ba jornalista sira iha Palásiu Prezidensiál, ohin.
Nia dehan, objetivu husi programa ne’e mak atu fahe esperiénsia no aprendizajen husi ema defisiente sira iha nasaun rua ne’e tuir programa ne’ebé maka alvu ona.
“Ami nia maluk husi Indonézia horseik foin to’o iha Timor-Leste, ami hahú hosi RHTO durante loron rua no iha loron tolu ami sei vizita Klinika Uma iha Aileu,” nia dehan.
Durante hasoru malu, Xefe Estadu apresia programa ne’e, tanba to’o agora, iha nafatin diskriminasaun ba ema defisiente sira iha Timor-Leste hanesan alokasaun orsamentu menus nafatin ba ema kbi’it la’ek sira no mós defisiente sira no programa ne’ebé RHTO halo di’ak tebes atu tulun ema difisiente sira iha área rurál.
Iha okaziaun ne’e, enkontru RHTO entrega motor roda tolu ba Prezidente Repúblika hodi fó ba defisiente sira iha área rurál ne’ebé presiza duni.
“Ami produz hela motor roda tolu hamutuk 10 ne’ebé iha produsaun iha Timor-Leste, ida fó ona ba Prezidente no rua seluk depois sei entrega ba ema ho defisiénsia sira ne’ebé presiza. Aleinde ne’e, motor roda tolu hitu sei bele fa’an hodi hasa’e rendimentu produsaun nian, hodi tulun ami nia programa ne’e, agora dadaun motor roda tolu ami bele ona produs iha Timor-Leste,” nia hateten.
Programa ne’e hetan apoiu husi Governu Alemaña, iha ne’ebé hala’o atividade sira hanesan modifikasaun motor roda tolu, resiklajen surat tahan no seluk tan.
Biban ne’e, Xefe Delegasaun Defisiente husi Indonézia, Angelus Kartomo, haksolok tebes hasoru Xefe Estadu Ramos Horta.
“Ami, husi ekipa aprendizajen CVR entre TL ho Indonézia Leste, liuliu, ohin hakarak aprende hamutuk kona-ba oinsá atu implementa inkluzaun sosiál ba defisiénsia TL no ami agradese no orgullu bele hasoru Prezidente, ne’ebé fahe buat barak kona-ba informasaun kona-ba oinsá atu implementa inkluzaun sosiál iha Timor-Leste,” nia hakotu.
Jornalista: Hortencio Sanchez
Editór: Florencio Miranda Ximenes
