DILI, 23 agostu 2024 (TATOLI)—Sekretaria Estadu Komunikasaun Sosiál (SEKOMS) no Igreja rejista ona jornalista hamutuk 362 husi nasionál no internasionál sei halo kobertura ba atividade vizita Pastorál Santu Padre Francisco iha loron 09 to’o 11 setembru, iha Dili.
Sekretáriu Estadu Komunikasaun Sosiál, Expedito Dias Ximenes, hateten, aplikasaun atu hetan karta kredensiál ba kobertura eventu boot ne’e liuhusi sistema online, ne’ebé rejista ona jornalista nasionál hamutuk 291 no estranjeiru 71.
“Daudaun ne’e ami halo hela preparasaun ba jornalista nasionál no internasionál hamutuk 362,” Sekretáriu Estadu hateten iha Konferénsia Episkopál Timorense, Bidau-Lecidere.
Notísia relevante : Governu-igreja lansa portál rejistu online akreditasaun ba jornalista sira
Totál 362 ne’e la sura ho jornalista na’in-85 ne’ebé sei akompaña Papa Francisco husi Vatikanu, nasaun balun iha Ázia no Dili, inklui jornalista timoroan na’in-tolu husi Rádiu Televizaun Timor-Leste, Empreza Públika (RTTL, E.P), Grupu Media Nasioál (GMN) no Agência Notisiosa de Timor-Leste, Institutu Públiku (Agência Tatoli, I.P).
Jornalista na’in-tolu husi instituisaun mídia tolu sei arranka bá Roma hodi akompaña vizita Pastorál Amu Papa to’o mai Timor-Leste no sei fila hamutuk bá Vatikanu ho Papa, hafoin fila mai Timor-Leste.
“Sira sei arranka bá Roma hodi hamutuk jornalista sira seluk hodi akompaña vizita Amu Papa nian,” nia tenik.
Jornalista : Jesuína Xavier
Editora : Julia Chatarina
