DILI, 16 Jullu 2024 (TATOLI)–Governu no igreja liuhosi Secretariado da Comissão Alto Nível Institucional visita Sua Santidade Papa Francisco mai Timor-Leste, tersa ne’e, lansa portál ba rejistu online akreditasaun ba jornalista nasionál no internasionál sira, atu halo kobertura ba vizita Papa Francisco durante loron tolu (09-11 setembru 2024) iha Timor-Leste.
Portál ne’e lansa husi Sekretáriu Estadu Komunikasaun Sosiál, Expedito Dias Ximenes, Ministru Administrasaun Estatal, Tomás do Rosário Cabral no Arsebispu Arkidioseze Metropolitana Dili, Dom Virgílio Kardeál do Carmo da Silva, SDB.
Sekretáriu Estadu Komunikasaun Sosiál, Expedito Dias Ximenes, hateten jornalista sira sei tama iha portál Governu nian hodi rejista aan ho rekezitu sira inklui karteira profisionál ne’ebé disponível iha sítiu https://timor-leste.gov.tl/?pp.
“Ita-nia serimónia ba ohin ne’e atu fó atensaun ba ekipa mídia ba vizita sua santidade nian no atu rejistu ba iha prosesu akreditasaun jornalista nasionál no internasionál sira,” Sekretáriu Estadu Komunikasaun Sosiál ne’e hateten ba jornalista sira liuhosi komunikadu imprensa ne’ebé realiza, iha eskritóriu Komisaun Organizadora simu Papa Francisco, iha Motael.
Governante ne’e hateten, vizita amu Papa nian nu’udar vizita Estadu ba pás, solidariedade no fraternidade tanba prezensa Santo Padre nian nu’udar sinál bensaun no esperansa.
Liuhusi portál ne’e, ekipa sei halo verifikasaun ba jornalista sira-ne’ebé bele hetan karta kredensiál ba kobertura vizita amu Papa nian, tanba limitasaun ba fatin atu halo kobertura, entaun organiza kobertura ida di’ak no profisionál.
“Sira hetan kartaun profisionál sei fahe ba eventu vizita amu Papa nian ba fatin sira-ne’ebé amu vizita ba. Prosesu selesaun ne’e rigorozu no transparensia,” nia dehan.
Governante ne’e hateten, jornalista nasionál sira-ne’ebé seidauk hetan karteira profisionál bele rejista aan iha Konsellu imprensa hodi bele hetan karteira profisionál provizóriu ba fulan rua nian.
QAleinde ne’e, komisaun organizadora mós sei lansa Talk Show kona-ba preparasaun vizita amu Papa nian iha Rádiu Televizun Timor-Leste (RTTL) semana ida dala-ida, ne’ebé sei hahú iha fulan-agostu.
Iha fatin hanesan, Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, hateten vizita amu Papa nian besik mai daudaun, entaun ohin iha eventu ida-ne’e lansa rejistu akreditasaun media nasionál no internasionál ba preparasaun vizita Papa Francisco nian.
“Ida-ne’e atu hatudu ba mundu buat ne’ebé (informasaun) kualidade, entaun liuhosi akreditasaun ida bele fó mensajen ida-ne’ebé tais,” Dom Virgílio Kardeál do Carmo da Silva hateten.
Kardeál hato’o nia votu susesu ba ema hotu ba preparasaun tomak ne’ebé halo hodi hein atu simu Papa Francisco mai vizita Timor-Leste.
Iha tempu hanesan, igreja no Goveru asina tan diploma ida atu reforsa servisu igreja nian ba vizita amu Papa nian.
“Diploma ida-ne’e atu haree preparasaun simu Santo Padre nian hahú iha Aeroportu, Sentru Kovensaun Dili, Katedrál, ALMA, misa Tasi-Tolu no haree mós ba iha lojistika ba fatin kardeál, bispu no jornalista sira hela hanesan Hotel Timor,” Ministru Administrasaun Estatál, Tomás do Rosário Cabral, hateten.
Tuir nia, ho diploma ne’ebé asina hosi igreja ne’e reforsa ba preparasaun atividade ba vizita amu Papa nian.
Jornalista : Jesuína Xavier
Editór : Cancio Ximenes
