DILI, 24 Agosto 2024 (TATOLI) – Sekretariu Estadu Komunikasaun Sosiál (SEKOMS), Expedito Dias Ximenes, informa Radiu no Televizaun Vatikanu mak sei halo tranzmisaun direta ho móvel ba misa solene iha Tasi-Tolu, ne’ebé preside husi Papa Francisco, iha loron 10 Setembru.
Governante ne’e dehan Rádiu Televizaun Timor-Leste (RTTL) no Grupu Media Nasionál (GMN) mos halo transmisaun direta, maibé iha fatin de’it no labele halo movimentu bá-mai.
“Kolega jornalista sira sei lahalo movimentu iha kobertura. Sé mak halo movimentu mak Televizaun Vatikanu no Radiu Sonora Vatikanu ne’ebé halo tranzmisaun ba rádiu hotu-hotu iha Itália. GMN ho RTTL móvel iha fatin de’it”, Expedito Dias esplika bainhira vizita fatin ba kobertura jornalista sira-nian, iha Tasi Tolu, ohin.
Sekretariu Estadu salienta katak iha tranzmisaun misa solene ne’e, pozisaun RTTL ho GMN sei iha parte norte besik altra nian. “Regra ne’ebé Vatikanu fó sira aas liu altar. Jornalista sira ne’ebé hasai foto iha rider, sira hamutuk ho sarani sira, maibé iha altura metru 2,5”, nia esplika.
Ba jornalista internasionál sira ne’ebé mai hamutuk ho Papa sei hamutuk iha sentru mídia iha Hotel Hilton hodi foti imajen no informasaun hodi haruka ba nia instituisaun idaidak.
Governante ne’e garante katak jornalista sira sei divulga imajen no informasaun ho lais, tanba iha operadora telekomunikasaun Telemor, Telkomcel, Timor Telecom no Starlink ne’ebe fornese liña internét ba mídia hotu.
Nia hatutan operadora telekomunikasaun hotu sei taka liña internét ba telefone sira hotu iha fatin sira ne’ebé Papa bá vizita. “Bele hasai foto, maibé labele asesu internét”.
Aleinde ne’e, Governu mós sei tau sentru mídia ida iha Ministeriu Telekomunikasaun no Transporte hodi bele hetan output iha ne’ebá.
Tuir dadus husi SEKOMS) no igreja, rejista ona jornalista hamutuk 362, nasionál 291 no internasionál 71, mak sei halo kobertura ba atividade vizita pastorál Santu Padre Francisco iha loron 09 to’o 11 setembru, iha Dili.
Notísia relevante: Jornalista 362 rejistadu halo kobertura ba vizita Papa Francisco
Jornalista Jesuína Xavier
Editora Maria Auxiliadora
