DILI, 05 setembru 2024 (TATOLI) – Ekipa selesaun nasionál futeból seniór susesu iha nia jornada playoff kualifikasaun Kopa Ázia 2027, hafoin halakon ekipa selesaun nasionál Mongolia ho rezultadu 4-1, iha ne’ebé ekipa rua hala’o jogu iha Estádiu Kapitaun I Wayan hanesan kampu klube Bali United nian, kinta loraik ne’e.
Maske Timor-Leste hasoru difikuldade boot kona-ba infraestrutura, liuliu laiha Estádiu ho padraun internasionál, maibé jogadór sira la lakon esperansa hodi lori Bandeira RDTL ba hetan vitória.
Estádiu Munisipál Dili ne’ebe nu’udar Estádiu bo’ot Timor-Leste nian to’o agora seidauk iha kondisaun atu hala’o jogu internasionál.
Ho situasaun sira hotu ne’e hotu nunka hamate vontade jogadór sira nian, kontinua hatudu ba mundu internasionál katak Timor-Leste la’ós nasaun forte liu no fraku liu, maibé kontinua haka’at ho neneik.
Realidade ekipa Lafaek hatudu bainhira jogu la’o ekipa halo kontra no atake ne’ebé maka’as hasoru ekipa Mongolia, maske Mongolia iha kapasidade naton atu kombate Timor-Leste nia jogu.
Asaun hotu Mongolia halo hela de’it hanesan asaun tanba ekipa Lafaek ne’ebé lideradu husi treinadór nasionaliade Xile,Simón Elissetche halo blokei maka’as iha liña oin.
Husi oportunidade ne’ebé Timor-Leste hetan la hela de’it hanesan oportunidade tanba jogadór João Pedro konsege fura rede Mongolia ho golu tolu iha minutu ‘3, ’27, ’52 no golu ikus termina husi jogadór Zenivio Mota iha minutu ’58.
Enkuantu golu úniku Mongolia nian realiza husi nia jogadór Oyunbaataryn iha minutu ’34.
“Ami kontente no agradese tanba vitória ne’e, Ita nia jogadór sira hatudu duni jogu di’ak no tuir duni espetativa ne’ebé ita prepara liuhusi treinamentu”, dehan Treinadór Selesaun Nasionál ne’e ba Ajénsia TATOLI, ohin.
Ho vitória ne’e, Treinadór dehan, tuir planu sei iha tan jogu daruak hasoru ekipa Mongolia iha loron 10 setembru.
“Aban, ami arranka bá fali Mongolia no to’o iha ne’ebá iha loron 7, nune’e iha loron 8 to’o 9 setemru halo treinu, nune’e iha loron 10 setembru ne’e, ita nia ekipa jogu daruak hasoru Mongolia,” nia informa.
Jornalista: Hortencio Sanchez
Editór: Florencio Miranda Ximenes
