Ajénsia ONU iha Timor-Leste hakarak apoiu dezenvolve setór produtivu
DILI, 06 setembru 2024 (TATOLI) -Líder másimu husi Ajénsia Internasionál sira ne’ebé iha Organizasaun Nasaun Unida (ONU) nia okos, hala’o enkontru ho Primeiru-Ministru (PM), Kay Rala Xanana Gusmão hodi konsulta atu apoia IX Governu Konstitusionál iha área prioridade sira, iha Timor-Leste.
Ajénsia UN nian ne’ebé enkontru ho Xefe Governu hanesan, UN Women, Organizasaun bá Migrasaun (IOM, sigla ingleés), Organizsaun Nasaun Unidas ba Fundu Labarik sira (UNICEF), Organizasaun Mundiál Saúde (WHO, sigla inglés), Organizasaun Mundiál Ai-han (WFP, siga inglés),
“Ami ko’alia oinsa servisu hamutuk entre Governu ho ajénsia sira ne’e, nune’e iha tinan hirak mai prezensa ONU nian bele fó benefísiu di’ak liu no bele ajuda Governu atu atende liu nesesidade povu no nasaun nian,” Xanana hateten ba jornalista sira iha Palásiu Governu, sesta ne’e.
Biban hanesan, Koordenadór Rezidente ONU nian iha Timor-Leste, Olufunmilayo Abosede Balogun-Alexander hateten, objetivu hasoru-malu ne’e importante, atu rona Primeiru-Ministru kona-ba oinsá ONU iha TL bele apoia di’ak liután Governu no povu timor.
“Tanba ne’e ami mai diskute ho Primeiru-Ministru kona-ba apoiu iha área saúde, edukasaun, feto sira, joven, nutrisaun, asuntu hotu-hotu ne’ebé importante bá Governu Timor-Leste, maibé mós ba ONU,” Olufunmilayo afirma.
Aproveita biban, Ajénsia ONU felisita Timor-Leste ne’ebé komemora aniversáriu Konsulta Populár bá dala-25 (30 Agostu 1999 – 30 Agostu 2024).
Ajénsia hirak ne’e mós mai hato’o apresiasaun profunda bá ospitalidade bo’ot ne’ebé Estadu Timor-Leste hatudu bá Sekretáriu Jerál ONU, António Guterres bainhira vizita no hamutuk komemora aniversáriu loron konsulta populár bá dala-25.
Enkontru ne’e termina ho tara tais no entrega kafé Timor nu’udár sínal amizade entre Governu ho Ajénsia internasionál sira.
Jornalista: Hortencio Sanchez
Editór: Florencio Miranda Ximenes
