DILI, 10 Setembru 2024 (TATOLI) – Florentino de Jesus Martins, tinan 89, hato’o nia testemuña moris kona-ba serbí igreja katólika durante tinan 56 ba Papa Francisco, iha enkontru ne’ebé realiza ho relijiozu no leigu sira iha igreja katedrál Imaculada Conceição, Dili, ohin.
Florentino Martins, ne’ebé moris iha Ermera, iha loron 21 Fevereiru 1935, konta nia istória kona-ba oinsá nia sai katekista voluntáriu, ne’ebé fó doutrina ba sarani sira iha igreja Ermera, nomós estasaun minisinária sira hanesan Hatolia, Letefoho, Atsabe, Railaco no Fatubessi
Katekista ne’e hahú estuda iha eskola Nuno Álvares Pereira iha Soibada, iha 1952 to’o 1955. Iha tinan 1956, padre Ezequiel nomeia nia hanesan katekista voluntáriu iha Misaun Katólika Ermera.
“Depoizde serbisu nu’udar katekista volutáriu durante tinan 6, iha 1962, nomeia ha’u hanesan katekista permanente Dioseze Díli nian husi Bispo Dom Jaime Garcia Goulart, no koloka ha’u iha Misaun Katólika Ermera. Nu’udar katekista, iha direitu ba remunerasaun mensál selu husi Dioseze. Depois ha’u-nia nomeasaun, ha’u kontinua fó doutrina iha igreja, iha estasaun misionária sira no iha suku sira. Ha’u prepara katekúmenu sira atu hetan batizmu no simu primeira komuñaun”, nia relata.
Nia konta katak bainhira nia fó katekeze ba sarani sira, iha altura ne’ebá, laiha transporte modernu no dalabarak tenke la’o ain kilómetru 6 to’o 10.
Fotísia relevante: Falta oras haat, Sarani sira nakonu ona iha Tasi-Tolu
“Durante perkursu ne’e, dalaruma ha’u enfrenta dezafiu hanesan udan no anin-boot iha viajen. Maske enfrenta dezafiu sira, nunka dezanima no kontinua serbisu ho responsabilidade tomak no ho dedikasaun”, nia relata.
Nia iha vontade atu serví igreja, maibé hanesan umanu nia iha limitasaun, tanba kestaun idade no kondisaun saúde tenke rezigna-aan husi nia serbisu iha 2017, ho tinan 82.
“Maibé ha’u kontinua fó konsellu no apoiu morál ba katekista sira seluk ne’ebé presiza ha’u-nia apoiu. Orgullu boot ida no ha’u iha gratidaun boot ba Maromak no Nossa Senhora tanba fó mai ha’u tinan naruk no toma parte iha evanjelizasaun hanesan katekista ativu durante períodu tinan 55”, dehan.
Husi nia serbisu barak ida ne’ebé ho forma voluntária, nia fiar katak Maromak rekompensa nia ho tinan naruk no felisidade ba nia família.
FOTO ATUÁL: Amu Papa ho relijiozu sira iha Katedrál nia sorumutu to’o ona nia rohan
Jornalista: Abílio Elo Nini
Editora: Maria Auxiliadora
