DILI, 13 Setembru (TATOLI) – Vise-Koordenadór ba Vizita Papa husi Igreja, Padre Guilhermino da Silva, informa igreja prezerva temporariamente materiál ba selebrasaun misa solene ne’ebé prezide husi Papa Francisco iha loron 10 Setembru ne’e iha sakristia Tasi-Tolu.
“Tuir planu ne’ebé iha, materiál sira iha ne’ebá hanesan meza altar, kadeira no sasán sira seluk sei konserva hotu iha fatin ne’ebá, la lori sai”, Pe. Guilhermino dehan ba Tatoli, iha Motael, ohin.
Nia hateten objetu sira ne’ebé igreja no Governu hanoin atu lori sai mak viatura ne’ebé tula Papa bainhira mai no lori bá Tasi-Tolu.
“Se Governu hatama ona nia planu iha orsamentu anuál nian atu halo konstrusaun di’ak ba muzeu ida iha ne’ebá [Tasi-Tolu], karreta sira ne’e bele lori filafali bá hanesan rekordasaun ida ba istória timoroan sira-nian iha futuru kona-ba prezensa Papa nian iha 2024”, nia reforsa.
Tuir dadus husi igreja, iha kadeira hamutuk tolu ne’ebé amu Papa tuur durante vizita pastorál iha Timor-Leste ne’ebé sei rai hotu iha Tasi-Tolu.
Igreja mós prepara sibóriu hamutuk rihun haat no túnika rihun haat ne’ebé foin ministru estraordináriu sira uza atu konserva hotu iha fatin ne’e.
Lembra katak Núnsiu Apostóliku Vatikanu iha Timor-Leste, Monseñór Marco Sprizzi, antes ne’e informa katak konstrusaun altar santu ba vizita Papa Francisco iha Tasi-Tolu sei husik hela hanesan muzeu ba timoroan no turista sira.
Monseñór salienta palku boot iha Tasi-Tolu ne’e bele sai permanente hafoin Papa nia vizita no iha loron boot ka nasionál ruma sei bele utiliza ba atividade sira seluk.
“Ho investimentu hotu-hotu ho okaziaun ba vizita Papa Francisco nian, Governu halo ba dezenvolvimentu Timór ein jerál. Krítika hotu-hotu la fó konta katak buat hotu sei hela ba timoroan, la’ós provizória”, monseñór hateten ba jornalista sira foin lalais ne’e.
Notísia relevante: Marco Sprizzi: Konstrusaun altar santu iha Tasi-Tolu sei hela hanesan muzeu
Jornalista: Jesuína Xavier
Editora: Maria Auxiliadora
