DILI, 17 setembru 2024 (TATOLI)—Ministériu Edukasaun (ME) hamutuk ho Komisaun Funsaun Públika (KFP), tersa ne’e, fó pose ba Vise-Prezidente foun Institutu Nasionál Formasaun Dosente no Professionál Edukasaun (INFORDEPE), Domingas Belo Amaral.
“Ami hein katak ita-boot sira sei uza koñesimentu ne’ebé hetan hodi kontinua formasaun ne’ebé iha ona no propoin kursu formasaun foun ba profesór sira. Meta ne’ebé estabelese ba INFORDEPE iha programa IX Governu Konstitusionál maka investe iha reestruturasaun atu nune’e bele fornese dezenvolvimentu profisionál ne’ebé progresivu no kualidade ba rekursu umanu iha edukasaun no garante formasaun ne’ebé efetivu liu ba jestór no profesór sira iha nível edukasaun hotu. Tanba ne’e, responsabilidade boot ba Gabinete Formasaun Profisionál no Kontinua alkansa rezultadu ne’ebé Ministériu Edukasaun define ona,” Reprezentamte ME no atuál Sekretáriu Estadu Ensinu Sekundáriu Tékniku Vokasional, Domingos Lopes Lemos, hateten iha serimónia tomada pose, iha salaun INFORDEPE, iha Balide.
Tanba ne’e, INFORDEPE daudaun ne’e hala’o projetu pilotu ba formasaun profesór sira iha ensinu sekundáriu tékniku vokasionál iha munisípiu lima.
“Iha fulan hirak tuir mai sei iha avaliasaun projetu pilotu ne’e hodi diskute kona-ba aspetu pozitivu no aspetu sira ne’ebé presiza hadi’a. Bazeia ba rezultadu sira-ne’e, bele iha espansaun ba programa ida iha tinan 2025 ba munisípiu hotu. Tanba ne’e, konta ho diretór no funsionáriu INFORDEPE sira hotu nia apoiu atu espansaun ba programa ne’e bele implementa iha territóriu nasionál tomak iha tinan oin mai. Ami konta, espesifikamente liu ho Vise-Prezidente foun nia apoiu iha asuntu ne’e, maski iha dezafiu hotu, ita kontinua fiar katak edukasaun mak dalan di’ak liu ba dezenvolvimentu ita-nia nasaun nia,” nia akresenta.
Notísia relevante : INFORDEPE fó formasaun lian portugés ba profesór 30 husi Ensinu Sekundáriu
Iha biban hanesan, Reprezentante KFP, José Telo Cristovão, husu ba Vise-Prezidente emposasu bele kontinua hala’o serbisu no kooperasaun ho parseiru sira hodi kontinua fó formasaun ba profesór sira.
“Husu atu serbisu didi’ak, tanba ita atu ko’alia kualidade edukasaun iha eskola hotu iha territóriu tomak ne’e nia baze mak sentru eselensiál ida hanesan INFORDEPE, tanba hanesan sentru formasaun ba profesór sira ne’ebé seidauk iha koñesimentu ne’ebé di’ak, entaun fatin ida-ne’e mak sira atu apreende hodi kontinua ba hanorin ita-nia oan sira atu sai matenek no susesu iha futuru, entaun presiza Prezidente ninia kooperasaun ho ita-nia parseiru sira atu kontinua serbisu hotu ne’ebé iha,” nia fó hanoin.
Nune’e mós, Vise-Prezidente foun INFORDEPE, Domingas Belo Amaral, konsidera knaar ne’e nu’udar priviléjiu ida ba nia, tanba ne’e nia kompromete sei serbisu ho di’ak atu alkansa no implementa objetivu hotu ne’ebé IX Governu estabelese ona.
“INFORDEPE nu’udár instituisaun ne’ebé hala’o papél krusiál tebes iha área formasaun profesór sira no ida-ne’e importante tebes ba futuru ita-nia rain. Nu’udár Vise-Prezidente eleitu sei nafatin fó apoiu ba Prezidente iha jestaun instituisaun nian, ho foku espesiál ba setór formasaun profisionál no kontinua ba edukadór no profesór sira husi nível hotu edukasaun ne’ebé integradu iha sistema edukativu, nune’e serbí ita-nia rai doben no kontribui atu nune’e Ministériu bele alkansa no implementa objetivu sira,” nia hato’o.
Domingas Belo Amaral dehan, líder ne’ebé efetivu no jestaun di’ak la’ós de’it ba foti desizaun, maibé mós atu rona, inspira no motiva funsionáriu sira hotu, inklui profesór sira ne’ebé envolve iha objetivu komún, ne’ebé presiza haraik-an atu apreende husi ema seluk no adapta atu hasoru sirkunstánsia sira ne’ebé muda beibeik inklui empatia atu kompreende nesesidade sira husi sira ne’ebé ita serbí.
“Tanba ne’e, husi ha’u-nia parte sei halo esforsu hotu atu harii ekipa ida-ne’ebé koezivu no komprometidu atu enkoraja kultura organizasionál ida-ne’ebé valoriza partisipasaun ativu husi funsionáriu hotu hodi enkoraja serbisu iha ekipa, kreatividade no inovasaun. Ita sei sai espasu ida iha ne’ebé rona ideia hotu no respeita kontribuisaun hotu, tanba ha’u fiar katak sei liuhusi perspetiva oin-oin maka ita sei hetan solusaun sira ne’ebé efikás no sustentável liu ba kresimentu no susesu INFORDEPE nian,” nia tenik.
Jornalista : Osória Marques
Editora : Julia Chatarina
