NOVA YORKE, 22 setembru 2024 (TATOLI)– Ministru Negósiu Estranjeiru no Kooperasaun, Bendito Freitas, akompaña husi Sekretáriu-Jerál g7+, Helder da Costa, hala’o enkontru bilaterál ho Ministru Negósiu Estranjeiru Guiné-Bissau, Carlos Pinto Pereira, hodi hato’o konvite ofisiál kona-ba enkontru Ministru Negósiu Estranjeirus (MNE) husi nasaun-membru g7+ ne’ebé sei hala’o iha fulan-Abríl 2025 iha Timor-Leste.
Enkontru MNE g7+ ne’e hala’o iha ámbitu komemorasaun tinan 15 ezisténsia Organizasaun Intergovernamentál ne’e, ne’ebé Timor-Leste mak sai hanesan nasaun pioneiru.
Notísia relevante:g7+ relata importánsia diálogu inkluziva, rekonsiliasaun no promove pás iha konferénsia prevensaun konflitu ONU
“Timor-Leste apresia ho partisipasaun ativa husi Guiné-Bissau nian iha g7+, nune’e, konvida mós sira atu partisipa iha enkontru referidu, tanba Guiné-Bisau hanesan nasaun membru ba organizasaun intergovernamental g7+,” Ministru Bendito hateten ba Agência TATOLI iha Nova Iorke, ohin.
Nune’e, liu husi enkontru ne’e mós, atu bele fortalese liután relasaun istórika no diplomátiku no mós hametin relasaun nu’udar maun-alin entre nasaun rua, ne’ebé karateriza partikulariedade no CPLP.
Enkuantu, assuntu ne’ebé ko’alia mós iha sorumutu ne’e kona-ba prosesu konstrusaun estadu, no mós atu fahe esperiénsia Timor-Leste nian no dezafiu sira iha prosesu konstrusaun estadu liu-liu iha mekanizmu kooperasaun multilaterál liuhusi fórum g7+.
Iha okaziaun ne’e, Sekretariu Jerál g7+ Helder da Costa, reforsa tan katak, reuniaun bilaterál entre parte tolu ne’e ko’alia kona-ba asuntu importante rua.
“Ami ko’alia kona-ba asuntu rua ida kona-ba Guine-Bisau nia kompromisiu ba membru g7+ sira no sira mós hanesan nasaun membru ba g7+ no sira mós sei partisipa iha eventu nivél aas ne’ebé sei hala’o semana ne’e. Segundu ami mós konvida Ministru Negósiu Estranjeiru Guine-Busaun atu partisipa reuniaun ministeriál g7+ nian ne’ebé sei hala’o tinan oin iha Dili,” Helder dehan.
Entretantu, g7+ harii iha loron 10 fulan-abríl tinan 2010, hanesan Organizasaun Intergovernamentál no halibur nasaun 20 ne’ebé afetadu husi konflitu no frajilidade, atu halo advokasia hodi harii dame no konsolidasaun estadu nu’udar xave ba dezenvolvimentu sustentável.
Iha tinan 2019, g7+ hetan estatutu hanesan observadór ba Nasaun Unida. No iha tinan 2021, ONU rekoñese ofisialmente g7+ karta Organizasaun Intergovernamentál (charter) ba nasaun afetadu husi konflitu, nune’e g7+ sai mós hanesan organizasaun multilateral ida.
Nasaun membru 20 iha g7+ mak hanesan Timor-Leste, Afganistaun, Burundi, Repúblika Sentrál Afrikana, Chade, Comores, Costa do Marfim, Repúblika Demokátiku Congo, Guiné, Guiné-Bissau, Haiti, Libéria, Papua Nova Guiné, Serra Leoa, Somália, Illas Salomaun, São Tomé e Príncipe, Sudaun Súl, Togo no Iémen.
Notísia relevante: g7+ toka pontu importante neen iha simeira ONU
Jornalista: Hortencio Sanchez
Editór: Florencio Miranda Ximenes
