COVALIMA, 23 Setembru 2024 (TATOLI) – Guarda florestál Covalima halo apreensaun ba kilat anin lima husi sidadaun sira, tanba kasa balada sira iha ai-laran tuan ne’ebé Estadu bandu.
“Parte ida husi serbisu rotina guarda florestál, bainhira halo patrullamentu no hasoru sidadaun kasa animál, ami tenke foti kilat anin husi sira hodi halo prosesu”, Xefe Departamentu Reflorestasaun Territóriál, Floresta no Planta Industriál Covalima, Domingos Gusmão dehan iha Kampung Baru, ohin.
Sidadaun-sira ne’ebé guarda florestál Covalima kaptura mai husi Fohorem, suku Dato-Tolu iha sidadaun na’in-tolu, Maucatar husi suku Belecasak nain-ida no Tilomar husi suku Beiseuk na’in-ida, ne’ebé nia prosesu Floresta Covalima relata ona ba diresaun nasionál atu foti desizaun.
Guarda florestál, Carlito Amaral, reforsa katak sira Guarda halo apreensaun ba kilat manu bazeia ba lei númeru 5/2017 ne’ebé hateten kualkér sidadaun labele utiliza kilat anin, rama ambon atu kasa animál fuik, tesi ai no seluk tan.
“Ita- nia Estadu bandu sidadaun-sira atu kasa animál fuik sira hanesan manu-fuik, meda, laku, rusa-fuik ne’ebé ita presiza atu kuidadu, maibé realidade hatudu ita-nia sidadaun balun uza kilat anin hakarak kasa animál ne’e”, nia dehan.
Guarda florestál nia serbisu la’ós halo patrullamentu ba sidadaun sira kasa animál iha ai-laran tuan sira, maibé serbisu seluk mak kontrola sidadaun sira ko’a ai nomós tula ai maran husi munisípiu ida bá munisípiu seluk, maibé iha tinan 2024 la kaptura ema sira tula ai maran.
Notísia relevante: Guarda florestál Covalima halo apreensaun ba kilat anin tolu
Jornalista: Celestina Teles
Editora: Maria Auxiliadora
