NOVA IORKE, 22 setembru 2024 (TATOLI) – Durante partisipa iha Assembleia Jerál Organizasaun Nasaun Unida, iha Nova Iorke, Primeiru-Ministru Kay Rala Xanama Gusmão deklara defende maka’as reforma estruturál Konsellu Seguransa Organizasaun Nasaun Unida (ONU).
Xanana hato’o pozissun ne’e iha ámbitu simeira summit of the future ne’ebé hala’o iha edifisiu ONU Nova Iorke, semana ne’e.
“Ha’u defende reforma estruturál Konsellu Seguransa, ne’ebé mak bosan ona, la efetivu no la reprezentativu bá realidade atuál sira,” Xanana Dehan.
Nia dehan tan, “Organizasaun internasionál ida bele hetan ninia únika kredível bainhira responde nesessidade sira atuál nian no la permanese vinkulada ba mekanizmu ida ne’ebé kriadu atu rezolve problema sira ne’ebé akontese kuaze tinan 80 liu-bá”.
“Ha’u apoia espansaun membru permanente sira Konsellu Seguransa, bá reprezentasaun boot ida ho nia lejitimidade jeográfika, kulturál no ekonómika ne’ebé boot-liu,” nia afirma.
Tuir nia, difísil tebes atu konkretiza prinsípiu sira kona-ba transparénsia, responsabilizasaun no konfiansa, enkuantu país riku no dezenvolvidu sira kontinua foti desizaun reprezenta país ki’ak no dezenvolvidu sira nia naran.
“Ida-ne’e hanesan kazu ne’ebé ema oituan de’it mak foti desizaun ba ita, la ho ita. Ha’u apoia invetimentu boot iha diplomasia preventiva ne’ebé identifika ninia kauza ba problema sira no fortalesa prosesu nasionál sira, no esforsu boot diplomasia nian atu rona no kompreende, kompara ho obriga solusaun teorétika sira deskontestualizada sira,” nia tenik.
Sessar-fogu ida ne’ebé tuir kedan ho negosisaun ne’e sempre preferível ba fornesimentu kontínua ba arma destinada atu halo derrota adversáriu sira-mínimu, abordazen hanesan ne’e liu-liu minimiza númeru feto no labarik inosente afetada sira husi konflitu.
“Hau mós defende no luta kontra estrutura ekonómika esploradora sira no mós dezigualdade estrema, apoiu finanseiru bá país dezenvolvidu sira. Komunidade internasionál presiza finansia esforsu sira bá dezenvolvimentu globál,” tenik.
Paktu ida ba futuru urjentemente – Paktu ida bá reforma ne’ebé haree bá futuru ho baze ba desafiu globál sira ohin loron nian no halo renovasaun ba konfiansa ema hotu nian, espesialmente jerasaun foun ne’ebé mak sei konkretiza.
“Oinsá mós, ita hotu moris iha planeta ida ne’ebé hanesan, ita hotu hanesan sidadaun mundu ne’e nian, ita-nia moris depende bá malu, no ita sei fahe ita-nia futuru ne’ebé agora daudaun ita deside,” katak.
Nia hatutan tan, iha fulan kotuk, Timor-Leste selebra ninia aniversáriu Konsulta Populár bá dala-25, iha Nasaun Unida nia mahan, iha ne’ebé povu Timor-Leste ho brani vota hodi hili ho korajozamente bá autodeterminasaun no bá ninia liberdade.
Independénsia Timor-Leste nian nu’udár konkista ida hosi povu timorense, maibé mós hanesan vitória bá sistema internasionál.
Ida-ne’e hatudu katak, ho empeñu, kooperasaun internasionál bele alkansa objetivu sira ne’ebé akordadu no enfrenta dezafiu inklui oportunidade sira iha ninia tempu.
No bainhira oras-ne’e Timor-Leste hanesan nasaun demokrátika ne’ebé estável no pasífika iha tranzisaun bá dezenvolvimentu, ida-ne’e la’ós de’it hetan apoiu hosi komunidade internasionál, maibé mós konta ho esforsu sira nasionál nian iha prosesu rekonsiliasaun no diálogu bá pás, atu garante futuru pasífiku ida.
“Ita hatene katak bainhira laiha pás, laiha kondisaun bá dezenvolvimentu. Ida-ne’e mak tenke halo investimentu bá ita-nia joven sira – iha kompeténsia sira no komportamentu edukativu sira, sosiál no sidadania – hanesan investimentu ida bá dezenvolvimentu sustentável no iha pás rohan laek,” nia afirma.
Pás sai hanesan konseitu abstratu ida ba nasaun barak
Sahara Osidentál hein ninia referendu dezde tinan 1992. Hein durante tinan 32 nia laran! direitu internasionál seidauk hakotu ninia kolonializasaun ikus iha Áfrika, ignora no haluha tiha de’it.
Komunidade internasionál seidauk hetan solusaun multilaterál sira bá futuru pás nian bá nasaun barak iha mundu tomak hahú hosi Palestina to’o Ucrânia, hosi Iémen to’o Sudão, hosi Repúblika Sentru-Afrikana to’o Repúblika Demokrátika Congo, hosi Afeganistão to’o Mianmar, no hosi Haiti to’o nasaun frázil barak ne’ebé sofre bá konflitu sira.
“Ita hotu hatene katak Nasaun Unidas estebelesidu hafoin Funu Mundiál da-ruak nian atu bele prezerva pás globál, direitus umanus no dezenvolvimentu internasionál,” hatutan.
Maski nune’e, agora daudaun ema hotu moris iha era ida ne’ebé nakonu ho dezórden, inserteza, no konflitu. Enfrenta dezafiu sira ne’ebé komplexu-liu, inklui krize klimátika, dezigualdade estrema, no tensaun jeopolítika ne’ebé kontinua aas.
País sira ne’ebé Menus Dezenvolvidu (PMA) no mós Estadu Illa Kiik Dezenvolvimdu sira (PEID) hein hela ho pasiénsia atu hetan solusaun ne’ebé iha liu fleksibilidade, inkluziva no reativa.
Meiu sira no mós finansiamentu atu bele alkansa Objetivu Dezenvolvimentu Sustentável sei limitadu tebes. Ida-ne’e insufisiente tebes atu kombate pobreza estrema, inseguransa alimentár, krize sira umanitária no alterasaun klimátika sira, lakon biodiversidade no degradasaun ambientál ne’ebé ameasa ezisténsia Estadu illa kiik balun, espesialmente iha Pasífiku.
Sira ne’ebé fó kontribuisaun menus liu bá krize globál mak sira ne’ebé sofre primeiru, sofre-liu no dala barak sofre izoladamente.
Nia dehan, sira mak sai vítima bá autór no polítika internasionál sira ne’ebé nakonu ho egoízmu, ne’ebé fó liu valorizasaun bá lukru ho podér kompara ho dignidade umana.
Bainhira krize makaas-liu, halo ema barak liu mak sofre bá hamlaha. Tanba ne’e maka dadus índise globál kona-bá hamlaha alarma makaas liu-tán. Oras-ne’e daudaun falta tinan neen de’it ona atu bele kumpre Objetivu Dezenvolvimentu Sustentável.
“Mundu ida oinsa mak ita ema hela bá ne’e, iha ne’ebé ita bele aguenta ho funu, maibé labele fó-han labarik sira? Ita akompaña ema rihun bá rihun mak mate iha Mediterrâneo, bainhira ema husik hela ninia rai moris fatin atu bele salva-an hosi konflitu no mós ki’ak. Ho paktu bá futuru ne’e, ita iha esperansa katak komunidade internasionál, espesialmente líder mundiál sira, sei bele enfreta krize ne’e nakonu ho preokupasaun boot no nakonu ho sensibilidade, liu-fali diskusaun sira kona-bá kestaun imigrasaun nian,” nia hakotu.
Notísia relevante: g7+ toka pontu importante neen iha simeira ONU
Jornalista: Hortencio Sanchez
Editór: Florencio Miranda Ximenes
