DILI, 24 setembru 2024 (TATOLI)—FALINTIL-Forsa Defeza Timor-Leste (F-FDTL) koopera ho Sekretaria Estadu ba Igualdade (SEI) inisia formasaun ka Training of Trainers (ToT) kona-ba violénsia bazeia ba jéneru hodi militár sira bele kompreende asuntu ne’e.
“Ita-nia ToT ne’e inisitiva maihusi F-FDTL, ne’ebé hakarak tebes serbisu hamutuk ho SEI hodi prense formasaun kona-ba violénsia bazeia ba jéneru. Objetivu husi formasaun maka importánsia ba militár sira atu kompreende kona-ba violénsia bazeia ba Jéneru no Planu Asaun Nasionál (PAN) 1325 feto, pás no seguransa tanba atu mantein nafatin efetividade, justu no tuir étika hodi integra prespetiva jéneru, asegura protesaun no partisipasaun feto iha aspetu pás no seguransa,” Diretora Nasionál Polítika Igualdade Jéneru iha SEI, Celeste Ramos Martins Gonçalves, informa ba Agência Tatoli, hafoin partisipa semináriu ho tema ‘Ambiente jestaun violénsia bazeia ba jéneru hodi hametin padraun mínimu iha Timor-Leste’, iha salaun Delta Nova, tersa ne’e.
Hafoin formasaun ne’e, formandu sira bele kontinua divulga ba sira-nia parseiru defeza Timor-Leste sira, liuhusi sira-nia abilidade no koñesimentu durante loron-lima, hahú loron 23 to’o 27 setembru 2024.
Nia konsidera formasaun ne’e importante, tanba ne’e SEI nafatin mantein no kontinua hodi bele alkansa polítika igualdade jéneru liga liubá iha prevensaun violénsia bazeia ba jéneru.
“Ita hotu hatene katak programa importante ne’ebé sai hanesan prioridade ba ita maka kontinua hodi bele alkansa polítika igualdade jéneru liga liubá iha prevensaun violénsia bazeia ba jéneru, la sees mós kona-ba oinsá ita ko’alia kona-ba presepsaun feto sira nomós oinsá haree kona-ba asuntu feto, pás no seguransa,” nia akresenta.
Notísia relevante : SEI kontinua reforsa sistema jestaun violénsia bazeia ba jéneru liuhusi semináriu
SEI iha polítika prioridade haat maibé programa ida-ne’ebé prioridade liu maka hakbiit no hasa’e advokasia liuhusi atividade oin-oin ba prevensaun violénsia bazeia ba jéneru inklui kona-ba feto, pás no seguransa, ne’ebé maka SEI serbisu hamutuk ho Ministériu Interiór.
“Ita-nia matadalan atubele prense didi’ak formatu ida kona-ba oinsá envolvimentu liña ministeriál sira hodi bele deskobre didi’ak kona-ba kestaun ida-ne’e hodi bele hatan kona-ba relatóriu anuál ne’ebé mak tenke submete ba Parlamentu Nasionál tuir ita-nia dekretu-lei númeru 7/2010, ne’ebé maka husik hele kompoténsia ne’e ba Sekretaria Estadu ba Igualdade hodi bele kompremetidu ho polítika prevensaun violénsia bazeia ba jéneru,” Diretora tenik.
Iha fatin hanesan, Deputy Team Leader programa Nabilan-Fundasaun Ázia, Maria Verónica, hateten, Fundasaun Ázia-Programa Nabilan hamutuk ho SEI sente orgullu los ohin loron bele to’o iha semana oin sei fasilita treinamentu ba iha treinadór sira kona-ba atu haforsa abilidade no kuñesimentu liga ho violénsia bazeia ba jéneru.
“Ida-ne’e liga mós ho parte importante husi membru F-FDTL ba okaziaun ida-ne’e, oinsá ita bele serbisu hamutuk hodi tau kbiit hamutuk hodi haforsa Planu Asaun Nasionál inklui mós ita haforsa abilidade iha serbisu atubele hametin igualdade ba iha jéneru inklui halakon violénsia bazeia ba jéneru iha Timor-Leste. Ha’u espera iha ita-nia hamutuk durante semana ida bele la’o ho di’ak no oinsá ita bele kontinua tau ita-nia kbiit hamutuk,” Deputy programa Nabilan, katak.
Formasaun referidu partisipa husi formadór husi Kuarter Jenerál F-FDTL hamutuk 15, ne’ebé kompostu husi mane na’in-tolu no feto na’in-12, Naval, Terrestre no Aéreu, inklui fasilitadór ba formasaun husi SEI no Fundasaun Ázia liuhusi Programa Nabilan.
Jornalista : Osória Marques
Editora : Julia Chatarina
