NOVA IORKE, 23 setembru 2024-Primeiru-Ministru (PM), Kay Rala Xanana Gusmão enkoraza líder sira husi Aliansa Estadu Illa Ki’ik Dezenvolvidu sira atu unidu no iha espíritu solidariedade forte hodi enfrenta problema sira ne’ebé iha.
Primeiru-Ministru enkoraja ne’e iha diskursu reuniaun líder sira Aliansa Estadu Illa Kiik Dezenvolvidu sira perante Sesaun 79 Assembleia Jerál Nasaun Unida nian iha, Third Avenue, Nova Iorke, ohin.
Iha intervensaun, Xanana Gusmão hateten, dékada tolu resin iha pasadu, komunidade internasionál rekoñese dezafiu sira jeográfiku no situasionál úniku ne’ebé Estadu Illa Kiik Dezenvolvidu Sira (SIDS) enfrenta.
Realidade ida-ne’e reafirma fila-fali ho forma konsistente, la’ós de’it iha konferénsia sira multilaterál nian, maibé mós iha instrumentu sira internasionál nian ne’ebé jurídikamente vinkulada.
Maibé, implementasaun ba kompromissu sira ne’ebé nesessáriu tebes atu apoia nasaun sira SIDS nian kontinua seidauk sufisiente.
Alterasaun klimátika kontinua agrava dezafiu sira dezenvolvimentu nian ne’ebé nasaun sira SIDS nian enfrenta. Balun hosi Estadu Illa Kiik Dezenvolvidu sira, enfrenta konsekuénsia terríveis tanba illa balun lakon kauza hosi subida nível tasi nian.
“Ami-nia dezafiu sira boot loos, maibé ami forte. Hamutuk, ita forsa liu problema ne’ebé ita enfrenta. Ami fiar, ami unidu iha solidariedade, ami bele servisu hamutuk ho koletivamente atu transforma ajenda internasionál hodi proteje ami-nia direitu no interesse sira no ami proteje dezenvolvimentu ida sustentável ne’ebé respeita prinsípiu sira Responsabilidade Komún, maibé Diferente no ida-idak iha ninia kapasidade,” Xanana Gusmão hateten.
Timor-Leste apoia plenamente deklarasaun husi Líder sira AOSIS nian kona-bá Subida Nível Tasi nian ho Soberania Estatál.
Nune’e mós, Timor-Leste lian ida hamutuk ho Aliansa ne’e atu apela bá kriasaun mekanizmu finanseira foun ida ne’ebé benefisia nasaun hotu-hotu SIDS nian ho forma ekuitativa, partikularmente sira ne’ebé vulnerável liu.
“Ita mós garante katak nasaun dezenvolvidu sira kumpre sira-nia responsabilidade, tuir duni direitu internasionál, atu apoia ita-nia objetivu dezenvolvimentu sustentável, respeita ita-nia direitu atu dezenvolve ita-nia rekursu sira no defini ita-nia dezenvolvimentu rasik.Timor-Leste apoia kompletamente implementasaun ABAS,” Primeiru-Ministru ne’e deklara.
Xanana mós konta katak, horisehik partisipa iha Simeira Kona-bá Futuru no adopta “Paktu bá Futuru”. Timor-Leste espera katak Paktu ida-ne’e sei iha duni forsa no kapasidade atu hakotu abordazen sira ne’ebé inkonsistente iha sistema internasionál atuál ne’ebé komplikadu no proporsiona kuadru ida realista-liu atu enfrenta situasaun diversa no komplexa ne’ebé nasaun sira AOSIS enfrenta.
“Ita hamutuk bele kontinua ezije futuru ida ne’ebé justu, ekuitativu no sustentável, iha ne’ebé laiha nasaun ida mak hela iha kotuk,” Xanana hakotu.
Notísia relevante: PM Xanana inaugura edifísiu g7+ iha Nova Iorke
Jornalista: Hortencio Sanchez
Editór: Florencio Miranda Ximenes
