NOVA IORKE, 24 setembru 2024 – Primeiru-ministru (PM), Kay Rala Xanana Gusmão ko’alia iha Organizasaun Nasaun Unidas (ONU) katak, ho solidariedade internasionál mak bele kombate kauza prinsipál sira bá estremizmu.
Primeiru-ministru ko’alia asuntu ne’e iha diskursu eventu Altu Nível “Iha Defeza Demokrasia, Kombate Estremizmu” iha ONU, Nova Iorke, ohin.
Eventu altu nível ida-ne’e loke ofisialmente husi Prezidente Repúblika Brazil, Luiz Inácio Lula da Silva ho Prezidente Governu España, Pedro Sánchez no marka prezensa husi delegadu internasionál sira mai-husi nasaun oioin iha mundu.
Kay Rala Xanana Gusmão konsidera okaziaun ida-ne’e hanesan onra boot ida hodi partisipa iha Eventu Altu Nível liu-liu bele ko’alia kona-bá defeza demokrasia no kombate estremizmu.
“Importante tebes bá ita hotu atu hamutuk iha solidariedade internasionál hodi proteze governasaun demokrátika no konstrui sosiedade pasífika no inkluziva. Ho de’it forma ida-ne’e mak ita bele kombate kauza prinsipál sira bá estremizmu,” Xanana Gusmão hateten iha diskursu.
Primeiru-ministru ne’e aprezenta observasaun katak, mundu ohin loron iha hela situasaun ida nakonu ho divizionizmu, nakonu ho instabilidade no dezordenadu.
“Ita asiste konsentrasaun riku-so’in ne’ebé boot, iha tempu hanesan iha ema millaun-resin mak luta kontra ki’ak no hamlaha ne’ebé estrema. Globalizasaun benefísia ema uitoan de’it no prejudika ema barak-liu,” Xanana dehan.
Alende ne’e, líder ezekutivu timoroan ne’e dehan, mundu bele asiste komportamentu norma internasionál sira ne’ebé la funsiona, nasaun jigante no forte sira sempre ignora tiha direitu internasionál tuir sira-nia hakarak.
Bele haree mós nasaun frázil sira no sira ne’ebé afetadu bá konflitu luta atu bele sobrevive, hafoin komunidade internasionál abandona tiha sira. Sira ne’e hotu hamosu sentimentu atu halo revolta, dezespero, estremizmu no ódiu.
“Iha ami-nia nasaun, ami apreende ho forma ida ne’ebé difísil-liu katak demokrasia bele eziste bainhira iha pás no dezenvolvimentu. Iha Timor-Leste ami tenke liuhusi prosesu rekonsiliasaun no konstrusaun pás ne’ebé difísil molok ami konstrui nasaun ida livre no demokrátika iha Sudeste Aziátiku. Ami apreende katak, atu kombate estremizmu, nesesáriu tebes atu aborda kona-bá kauza prinsipál sira bá konflitu,” Xanana sita tan.
Nia hatutan, prosesu ne’e iha signifikadu bá realizasaun diálogu nasionál ida no rona povu ne’ebé sente abandonadu. Laiha solusaun fásil ida atu kombate estremizmu.
“Ita sei labele halo funu atu alkansa pás. Kontráriu, ita tenke aborda estrutura ekonómika no sosiál sira ne’ebé ha-fahe ita no lori ita atu hamosu dezigualdade no konflitu. Ita presiza kria kondisaun ekonómika ne’ebé hamosu empregu no oportunidade, ita tenke fó esperansa bá ita-nia povu ho sira-nia família,” Xanana Gusmão subliña.
Tuir nia, hotu-hotu presiza atu aprende ba malu no fó apoiu ba malu atu dezenvolve instituisaun sira sai forte no oferese kapasitasaun ba Estadu atu presta servisu saúde no edukasaun ba populasaun, labele husik nasaun ida iha kotuk tanba frazilidade no konflitu mak hamosu estremizmu.
Ho ida-ne’e maka sai hanesan baze atu estabelese organizasaun g7+, grupu ida-ne’ebé kompostu husi nasaun frázil hamutuk 20 no afetadu hosi konflitu, halibur hamutuk atu partilla esperiénsia no ko’alia lian ida de’it perante komunidade internasionál.
Xanana husu tenke konstrui reziliénsia no esperansa iha nasaun frázil sira atu apoia demokrasia no prevene kresimentu estremizmu internasionál. Estremizmu dezenvolve-an makaas mai hosi tauk no divizionizmu, maibé demokrasia dezenvolve aan ho inkluzaun no esperansa.
Nia hatutan tan, mundu ne’ebé kompleksu no insertu iha ohin loron, hotu-hotu tenke kaer metin ba iha valór sira toleránsia, edukasaun no diálogu.
Xanana apela ba hotu-hotu atu hamutuk, tenke halo asaun solidariedade atu promove páz no dezenvolvimentu, afirma posibilidade bá esperansa.
Jornalista: Hortencio Sanchez
Editór: Rafael Ximenes de A. Belo
