Xanana propoin TL sai uma-na’in ba futuru konvensaun ba pás
NOVA IORKE, 24 setembru 2024-Primeiru-Ministru (PM), Kay Rala Xanana Gusmão, aprezenta proposta ida kona-bá Timor-Leste bele sai uma-na’in ne’ebé neutru ba futuru konversasaun pás nian.
Primeiru-Ministru hato’o proposta ne’e iha Reuniaun Bilaterál ho Prezidente Konsellu Lideransa Prezidensiál Iêmen, Rashad Mohammed Al Alimi iha Nova Iorke, ohin.
“Ha’u aprezenta mós proposta ida kona-ba Timor-Leste bele sai hanesan uma-na’in ne’ebé neutru ba futura konversasaun pás nian, ba únika dezafiu ne’ebé Iémen hasoru,” Xanana Gusmão hateten.
Primeiru Ministru konsidera hanesan prazer ida bele koñese Rashad Mohammed Al Alimi no maski relasaun diplomátika sei foun loos, maibé Xanana haree hetan poténsia boot ba kolaborasaun iha área barak, espesialmente iha âmbitu g7+.
Iha enkontru ne’e Xanana mós aprezenta katak, foin lalais ne’e Timor-Leste selebra ninia aniversáriu referendu ba dala 25, no ho istória markadu ne’e hanesan períudu reflesaun ida forte kona-bá progressu no konkista konstrusaun país ida ne’ebé pasífiku, sustentável no demokrátiku.
“Ha’u sei hanoin hela iha memória kona-ba ami-nia enkontru entre ha’u ho Vise-Prezidente Gen Al-Zubaidi iha inísiu tinan ne’e iha Davos, ami diskute no partilla ami-nia esperiénsia sira kona-ba diálogu nasionál no mós rekonsiliasaun atu promove unidade iha Iémen,” nia hateten tán.
Pessoa eminente ne’e mós kompriende katak, g7+ ho ekipa Vise-Prezidente partilla ona proposta ida kona-bá missaun ida ne’ebé liderada hosi delegasaun Konsellu Tranzisaun Súl, liderada hosi Vise-Prezidente rasik.
“Prezidente, ha’u hakarak atu reafirma apoiu Timor-Leste nian iha g7+ kona-ba unidade no koezaun iha Iémen. Ha’u rekoñese difikuldade sira iha prosesu rekoperasaun no alkansa akordu polítiku sira ba longu prazu no ha’u propoein medida sira extra ba kriasaun konfiansa. Ha’u hakarak mós atu enkoraza ita boot atu partisipa iha simeira g7+, ne’ebé sei realiza iha aban iha sede ONU nian,” Xefe Governu ne’e husu.
Ikus liu, Primeiru-Ministru agradese tanba bele hetan oportunidade hodi hasoru-malu ho Rashad Mohammed Al Alimi no fiar katak reuniaun ida-ne’e sei sai inspirasaun atu estabelese kooperasaun boot no amizade entre país rua.
Timor-Leste espera sei esplora área sira ba kooperasaun iha futuru.
Jornalista: Hortencio Sanchez
Editór: Florencio Miranda Ximenes
