OÉ-CUSSE, 26 Setembru 2024 (TATOLI) – Estudante hamutuk 394 iha Eskola Sekundária Jerál (ESJ) Palaban, Oé-Cusse, prontu atu realiza ezame nasionál, informa Diretór Eskola, Juvinal da Cruz Salu.
“Totál estudante sira iha ESJ Palaban hamutuk 1.150, maibé kandidatu atu partisipa ezame nasionál tinan ne’e iha na’in-394. Siénsia Téknolojia iha 182 no Siénsia Sosiál hamutuk 212. Agora, sira preparadu atu partisipa iha ezame nasionál”, Juvinal Salu hateten ohin.
Kona-ba preparasaun ba eskola nian, daudaun ne’e estabelese ona komisaun organizadora ne’ebé komposta husi profesór vijilante ba kada eskola ne’ebé sei koloka na’in-lima no verifikasaun prova ba ezame nasionál.
“Komisaun ne’ebé ami prepara mak profesór vizilante hodi koloka bá eskola sekundária sira no ekipa verifikasaun ba ezame nasionál. Daudaun, ami hein de’it númeru ezame nasionál ba alunu sira husi Ministériu Edukasaun, tanba seidauk koloka mai atu taka ba sala eskola idak-idak”, hateten.
Foto Tatoli/Abílio Elo Nini
Atuál Prezidente Komisaun ba Ezame Nasionál ne’e informa kona-ba kartaun ezame nasionál ba kandidatu sira prepara ona husi komisaun ho modelu uniforme.
Juvinal da Cruz Salu salienta katak mekanizmu ba konsentrasaun ezame ne’e la’ós de’it ba nasionál, maibé asegura mós prosesu ezame lokál.
“Tanba iha esperiénsia pasada, ema hotu konsentra de’it ba iha ezame nasionál, maibé ezame lokál ne’e hanesan ladún tau importánsia. Entaun, tinan ne’e, liuhusi komisaun ami kria kondisaun ne’e hanesan ezame nasionál no ezame lokál”, dehan.
Notísia relevante: Servisu Edukasaun seidauk presta atensaun másima ba ensinu rekorrente iha Oé-Cusse
Totál estudante hotu iha nivél ensinu sekundáriu jerál ne’ebé sei realiza ezame ne’e iha rihun-resin.
Antes ne’e, Xefe Departamentu INFORDEPE no Kurrikulu Ezame Nasionál Oé-Cusse, Damião da Costa, hateten alunu hamutuk 3.260 mak sei partisipa iha ezame nasionál 2024, ne’ebé kompostu husi ensinu báziku iha 1.794, ensinu sekundáriu hamutuk 1.045 no tékniku vokasionál 421.
Damião da Costa antes ne’e inform katak ezame nasionál sei akontese iha loron 14 Outubru.
Notísia relevante: Estudante 3.260 iha Oé-Cusse mak sei realiza ezame nasionál
Jornalista: Abílio Elo Nini
Editora: Maria Auxiliadora
