DILI, 30 setembru 2024 (TATOLI)—Sekretaria Estadu Arte no Kultura (SEAK), Sentru Nasionál Chega, Institutu Públiku (CNC, I.P) no Rejiaun Administrativa Espesiál Oé-cusse Ambeno (RAEOA) sei realiza festivál kultura fronteira 2024 iha loron 14 to’o 18 outubru tinan ne’e.
“Finanseiru mai husi instituisaun tolu ne’e, la liu $200.000. Atividade ne’e hanesan atividade anuál, ho objetivu atu hametin liután relasaun amizade fraternidade entre timoroan ho timoroan no komunidade iha área fronteira. Tanba ne’e mak ita halo festivál ida-ne’e iha fronteira,” Sekretáriu Estadu Arte no Kultura, Jorge Soares Cristovão, hateten, ba Agência Tatoli, iha Aeroportu Comoro, segunda ne’e.
Notísia relevante : Kampu Palaban sai fatin ba realizasaun Festivál Kultura Fronteira 2024
Festivál kultura fronteira ne’e sei iha atividade oin-oin husi grupu kulturál no arte sira husi fronteira, kompostu husi noite kulturál, ne’ebé sei aprezenta dansa kulturál husi timoroan no NTT iha feira no kulinária tradisionál.
Atividade prinsipál husi eventu ne’e mak sei realiza mós semináriu kona-ba aprosimasaun kulturál no arte.
“Ita ko’alia kona-ba aprosimasaun kulturál arte hodi hametin relasaun entre joven sira iha área fronteira, ita halo diálogu entre joven ho joven sira hodi hametin ita-nia rekonsiliasaun, ita halo workshop entre artista sira hodi fahe sira-nia esperiénsia ba malu, entre artista sira husi timor no NTT.
Aleinde ne’e, molok atu abertura sei lansa livru relatóriu ba atividade sira ne’ebé mak halo iha tinan 2022.
“Ita sei lansa iha ne’ebá hodi hatene vantajen saida mak ita hetan iha festivál sira-ne’e rasik,” nia katak.
Festivál Rabilau
Iha loron seluk, sei realiza mós festivál Rabilau iha loron 16 to’o 19 outubru, ne’ebé sei partisipa mós husi Embaixada Rezidénsia sira iha Timor-Leste no Embaixada Indonézia ne’ebé sei aprezenta dansa kultura ida.
“Embaixada sira iha Timor-Leste sei partisipa hotu no iha Embaixada balun mós sei aprezenta nia dansa tradisionál balun, ne’ebé mak Indonézia rasik mós sei aprezenta,” Sekretáriu Estadu Arte no Kultura, Jorge Soares Cristovão, informa.
Autoridade lokál sira prepara hela atividade festivál Rabilau ho di’ak to’o ohin loron.
“Liu-liu Autoridade Maubisse preparadu inklui líder komunitáriu sira-nia apoiu, autoridade munisípiu Ainaro mós ita iha koordenasaun no komunikasaun no sira prepara atu apoiu, ha’u mós dehan ona ba diretór sira hotu atu koordena mós ho autoridade munisípiu sira hotu, munisípiu 12 inklui Rejiaun Administrativu Espesiál Oé-cusse Ambeno (RAEOA) sira-nia partisipasaun,” nia dehan.
Liña kordenasaun la’o di’ak tebes no partisipante husi munisípiu hotu sei to’o fatin iha loron 15 outubru.
“Munisípiu ida-idak sei haruka grupu kulturál sira hodi mai partisipa iha eventu ida-ne’e. Partisipante husi munisípiu sira-ne’e koordena hotu ona, sira sei to’o iha Ainaro iha loron 15 outubru, ne’ebé iha loron ne’e ita sei halo misa agradesimentu ida no lorokraik ita sei halo serimónia kulturál hodi simu matak malirin husu lisensa ba fatin atu ita bele halo ita-nia atividade ne’e,” nia informa.
Orsamentu ba festivál Rabilau purvolta $320.000, ho atividade desportu, siénsia teknolojia, atividade edukasaun, atividade biblioteka móvel, kompetisaun ba prezépiu, atividade natal do povu ne’ebé kada tinan Prezidente sempre festeza natal no tinan foun hamutuk ho komunidade iha Timor-Leste, iha mós atividade desportiva hanesan boxing, taekwondo, iha mós atividade kulturál, feira no atividade espozisaun.
Jornalista : Osória Marques
Editora : Julia Chatarina
