OÉ-CUSSE, 24 Setembru 2024 (TATOLI) – Sekretariu Rejionál ba Asuntu Administrasaun, Rejiaun Administrativa Espesiál Oé-Cusse Ambeno (RAEOA) no Sekretaria Estadu Arte no Kultura (SEAK) deside kampu 01 de Maio Palaban, iha suku Costa, sub-rejiaun Pante Makasar, sai fatin ba realizasaun Festivál Kultura Fronteira 2024.
“Agora, ita prepara ona Festivál Fronteira iha Oé-Cusse, ne’ebé organiza husi SEAK. Koordenasaun la’o antes ona, fatin ita identifika uza de’it kampu 01 de Maio Palaban, ne’ebé preparasaun ita kontinua la’o, tanba ita mak sai uma-na’in ba eventu ofisiál ne’e”, Sekretáriu Rejionál ba Asuntu Administrasaun, André Lao, dehan ba Tatoli iha Oé-Cusse, ohin.
Notísia relevante: SEAK koordena ho RAEOA partisipa festivál kulturál fronteira
Nia informa katak enkontru tékniku kona-ba preparasaun hodi kria komisaun realiza ona iha semana kotuk, tanba atividade barak mak sei realiza.
“Agora ita-nia ekipa husi RAEOA lidera husi Koordenadór João Gonçalves no Sekretária Rejionál ba Asuntu Agrikultura. Iha kuarta aban, sei dezloka bá Kupang atu koordena ho Governadór NTT no autoridade Kupang, TTS, TTU, Timor Osidentál no Malaka, atu konvida sira mai partisipa iha eventu ne’e. Iha Timor-Leste mak munisípiu sira-ne’ebé fronteira hanesan Bobonaro no Covalima”, nia adianta.
Tanba ne’e, koordenasaun ho Governu sentrál atu fó apoiu ba asuntu ne’e lao hela, nune’e eventu referidu la’o ho di’ak no susesu. “Hanesan uma-na’in serbisu hamutuk ho parte hotu, setór privadu sira lidera husi CCI, sosiedade sivíl no entidade releventante sira seluk”.
Nia informa katak kaléndariu ba implementasaun eventu ne’e durante semana ida, sei hahú iha loron 13 to’o 19 Outubru 2024.
“Partisipante husi Oé-Cusse sei konvida komunidade iha suku 18. Agora, ita informa ona xefe suku sira atu haruka kooperativa sira, grupu kreativu atu prepara hodi aprezenta iha festivál ne’e”, nia hateten.
Festivál Kultura Fronteira ne’e sei realiza iha Outubru no komemora loron Proklamasaun Independénsia ba da-49 iha RAEOA. Atividades ne’ebé sei anexa iha eventu rua ne’e maka semináriu konferénsia rejionál ba turizmu, korrida cavalo, jogu amizade fronteira cup, Off Road Racing, Drag Bike, dada tali nivel fronteira, motocross, taekwondo ATRO fronteira Cup, aprezentasaun sepetakulár gebyar tinan 10 ba kriasaun RAEOA, feira livru no bazár baratu.
Notísia relevante: SEAK-CNC atualiza programa interkámbiu kulturál Balibo ba Horta
Jornalista: Abílio Elo Nini
Editora: Maria Auxiliadora
