DILI, 02 outubru 2024 (TATOLI) – Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Domingos Raul ‘Falur Rate Laek’, simu karta (Misiva) ida husi Primeiru- Ministru Xanana Gusmão, kona-ba manutensaun ba Ró Komponente Navál ho naran Jaco, ne’ebé to’o agora sei avaria no para hela iha Postu Administrativu Metinaru, Munisípiu Dili.
“Foin daudauk ha’u simu despaisu ida husi Primeiru-Ministru atu haree kondisaun Komponente Navál Jaco ne’ebé to’o agora sei avaria. Ne’ebé ha’u haruka no fó instrusaun ba Komponente Navál ba halo tiha avaliasaun, espesifikasaun, relatóriu ha’u hatama tiha ona iha Ministériu Defeza. Horseik ami rua Ministru Defeza koalia ona hodi haruka konsultór ida atu mai haree kondisaun Ró ne’e. Depois sira fó pareser ba Primeiru-Ministru atu deside solusaun oinsá halo manutensaun ka desmantela (abate)”, Falur Rate Laek hateten ba jornalista sira hafoin remata enkontru avaliasaun ekipa forsa tarrefa konjunta ‘Pombu Mutin ba seguransa vizita Sua Santidade Papa Francisco mai Timor-Leste ne’ebé halao iha Sentru Formasaun Polísia (CFP, sigla portugés) Comoro, kuarta, ohin.
Falur dehan, kuandu konsultór mak haree kondisaun Ró Navál, labele halo ona manutesaun hanesan Xefe Estadu Maiór Jenerál F-FDTL sei rekomenda ba Governu atu tranforma tiha Ró Navál ba fatin turizmu.
“Ha’u nia opsaun ha’u hateten katak kuandu ró ne’e labele halo ona manutensaun mak ita sei tiha entrega tiha ba ministru turizmu hodi halo tiha projetu turizmu, halo tiha ró ne’e sai ró ahi otél para ema bele han iha laran”, nia adianta.
Jornalista: Natalino Costa
Editór : Zezito Silva
